ផ្ទះ៣៣ខ្នង ក្នុងស្រុកមោងឫស្សី ត្រូវខ្យល់កន្ត្រាក់​បំផ្លាញយ៉ាងដំណំ

ខេត្តបាត់ដំបង ÷ លំនៅឋានរបស់ប្រជាពលរដ្ឋចំនួន៣៣ខ្នង ត្រូវបានខូចខាតស្ទើរទាំងស្រុង បន្ទាប់ពីមានភ្លៀងធ្លាក់មួយប្រាវ បណ្តាលឱ្យមានខ្យល់កន្ត្រាក់បោកបក់យ៉ាងខ្លាំង។

ហេតុការណ៍នៃគ្រោះធម្មជាតិនេះ បានកើតឡើងកាលពី ថ្ងៃទី២៣ ខែមីនា ឆ្នាំ២០២៣ វេលាម៉ោង៦ល្ងាច ស្របពេលដែលមេឃកំពុងធ្លាក់ភ្លៀងមួយមេ ក៏ស្រាប់តែមានខ្យល់កន្ត្រាក់បោកបក់មកយ៉ាងខ្លាំង​បណ្តាលឱ្យផ្ទះរបស់ប្រជាពលរដ្ឋប្រមាណ ៣៣ ខ្នងរងការខូចខាត។

បើតាមសេចក្តីរាយការណ៍របស់សមត្ថកិច្ចមូលដ្ឋានបានបញ្ជាក់ថា ខ្យល់កន្ត្រាក់លាយឡំនឹងភ្លៀងយ៉ាងខ្លាំង បានបោកបក់ចូលទៅលើឃុំចំនួន២ ក្នុងស្រុកមោងឫស្សី គឺឃុំឫស្សីក្រាំង និងឃុំកកោះ។

 សមត្ថកិច្ចបានបន្ថែមថា នៅក្នុងឃុំប្ញស្សីក្រាំង គឺខូចខាតផ្ទះចំនួន ២២ ខ្នងផ្ទះខ្នង និងឃុំកកោះ ខូចខាតចំនួន ១១ ខ្នងផ្ទះ ដែលក្នុងនោះមាន របើកដំបូល ធ្លាក់ពីលើជើងតាង និងខដួលរលំទាំងស្រុង  ប៉ុន្តែនៅក្នុងករណីនេះ មិនមានប៉ះពាល់ដល់អាយុជីវិតមនុស្សឡើយ៕ អត្ថបទ÷ សោ និយមរ័ត្ន