ច្បាប់គ្រប់គ្រងទឹកឈរលើគោលការណ៍តម្លាភាពក្នុងការផ្តល់សេវាទឹកស្អាត

ច្បាប់គ្រប់គ្រងទឹកស្អាតមានវិសាលភាពអនុវត្តចំពោះការផ្ដល់សេវាផ្គត់ផ្គង់ទឹកស្អាត ដើម្បីលើកកម្ពស់សុខភាពសាធារណៈ និងជីវភាពរស់នៅរបស់ប្រជាពលរដ្ឋដោយឈរលើគោលការណ៍តម្លាភាព និងសមធម៌។

រាជរដ្ឋាភិបាលកម្ពុជាបានប្រកាសដាក់ឱ្យប្រើប្រាស់ច្បាប់ស្តីពីការគ្រប់គ្រងទឹកស្អាតនៅថ្ងៃទី ១១ ខែមីនា ឆ្នាំ២០២៣ ដែលច្បាប់នេះបានកំណត់អំពីក្របខ័ណ្ឌគតិយុត្តសម្រាប់ការគ្រប់គ្រង និងអភិវឌ្ឍន៍ការផ្គត់ផ្គង់ទឹកស្អាតនៃព្រះរាជាណាចក្រកម្ពុជា។

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន បានរួមសហការអនុវត្តគម្រោងជាបន្តបន្ទាប់លើការអភិវឌ្ឍវិស័យទឹកស្អាតនៅកម្ពុជា ហើយក្នុងនោះសេចក្តីព្រាងច្បាប់ស្តីពីការគ្រប់គ្រងទឹកស្អាត ត្រូវបានផ្ដួចផ្ដើមនិងគាំទ្រក្នុងជំហានដំបូងតាមរយៈគម្រោងពង្រឹងសមត្ថភាពគ្រប់គ្រងវិស័យទឹកស្អាតទីប្រជុំជនកម្ពុជា ​(ជំហានទី៣) ដែលបានអនុវត្តចាប់ពីឆ្នាំ២០១២ ដល់ឆ្នាំ២០១៨។​

បើតាមសេចក្ដីប្រកាសព័ត៌មានរួម ច្បាប់នេះមានវិសាលភាពអនុវត្តចំពោះការផ្ដល់សេវាផ្គត់ផ្គង់ទឹកស្អាតដើម្បីលើកកម្ពស់សុខភាពសាធារណៈ និងជីវភាពរស់នៅរបស់ប្រជាពលរដ្ឋប្រកបដោយបរិយាបន្ន និងត្រូវឈរលើគោលការណ៍ដូចខាងក្រោម៖

– ធ្វើឱ្យមានតម្លាភាពនិងសមធម៌ក្នុងការផ្តល់សេវាផ្គត់ផ្គងទឹកស្អាត

– ធ្វើឱ្យមានសមភាពនិងមិនមានការរើសអើងរវាងអ្នកផ្តល់សេវានិងអ្នកទទួលសេវាផ្គត់ផ្គងទឹកស្អាត

– លើកទឹកចិត្តដល់វិនិយោគិនជាតិនិងអន្តរជាតិឱ្យចូលរួមវិនិយោគក្នុងវិស័យទឹកស្អាត

– ផ្តល់សេវាផ្គត់ផ្គង់ទឹកស្អាតដោយឈលើលក្ខខណ្ឌ៤យ៉ាងគឺ ទឹកស្អាតត្រូវមានគុណភាព សុវត្ថិភាព និរន្តរភាព និងតម្លៃសមរម្យ។

ច្បាប់ស្តីពីការគ្រប់គ្រងទឹកស្អាត គឺជាច្បាប់លើកដំបូងរបស់កម្ពុជាក្នុងវិស័យផ្គត់ផ្គង់ទឹកស្អាត និងត្រូវបានគិតគូរយ៉ាងហ្មត់ចត់ក្នុងដំណាក់កាលរៀបចំសេចក្តីព្រាងច្បាប់​នេះ។  

JICA គឺជាដៃគូអភិវឌ្ឍដ៏យូរអង្វែងលើវិស័យទឹកស្អាតនៅកម្ពុជា, រដ្ឋាភិបាលជប៉ុន តាមរយៈអង្គការJICA នឹងប្តេជ្ញាធ្វើការយ៉ាងជិតស្និទ្ធជាមួយ រាជរដ្ឋាភិបាលកម្ពុជាតាមរយៈការពង្រឹងភាពជាដៃគូយុទ្ធសាស្រ្តរយៈពេលវែង ដើម្បីឱ្យ សម្រេចបាននូវការទទួលបានទឹកស្អាត និងសុវត្ថិភាពសម្រាប់ប្រជាជនកម្ពុជា៕

អត្ថបទ៖ ឡេង ដេត