អ្នក​សារព័ត៌មាន​មកពី ៤០ ស្ថាប័ន​ចូលរួម​វគ្គ​បណ្ដុះបណ្ដាល​ពី​វិស័យ​ធនាគារ និង​ហិរញ្ញវត្ថុ

នៅ​ព្រឹកមិញ​នេះ សមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) និង​សមាគម​ធានារ៉ាប់រងកម្ពុជា (IAC) ដោយ​សហការជាមួយ​ក្លឹបអ្នកកាសែតកម្ពុជា (CCJ) បាន​បើក​​វគ្គ​បណ្តុះបណ្តាល​មូលដ្ឋានគ្រឹះ​ជូនដល់អ្នកសារព័ត៌មាន ៥៨ នាក់ និងការីនិពន្ធ ២០ នាក់មកពី ៤០ ស្ថាប័នក្នុងស្រុក និងអន្តរជាតិផ្សេងៗគ្នា។

បើ​យោង​តាម​សេចក្តី​ប្រកាស​ព័ត៌មាន ការ​រៀបចំ​កម្មវិធី​បណ្តុះបណ្តាល​នេះដើម្បី​ចូលរួម​ចំណែក​លើកកម្ពស់​ចំណេះដឹង​ហិរញ្ញវត្ថុជាមូលដ្ឋានដល់អ្នកសារព័ត៌មាន ក្នុង​ការ​សរសេរ​អត្ថបទ​ព័ត៌មាន​ទាក់ទងនឹងវិស័យធនាគារ ហិរញ្ញវត្ថុ និងធានារ៉ាប់រង ឱ្យបានស៊ីជម្រៅនិងគ្រប់ជ្រុងជ្រោយ។

កម្មវិធីនេះ​ធ្វើឡើង ក៏​ដើម្បីរួម​ចំណែក​ក្នុងការ​កសាង​ភាពធន់ភាពរឹងមាំ​នៃវិស័យ​ធនាគារ មីក្រូ​ហិរញ្ញវត្ថុ​និង​វិស័យ​ធានារ៉ាប់រង​តាមរយៈ​ការផ្តល់នូវ​ចំណេះដឹង​ជា​មូលដ្ឋាន​គ្រឹះបន្ថែម​ទាក់ទង​នឹង​វិស័យ​ធនាគារ និង​ហិរញ្ញវត្ថុ ក៏ដូចជា​វិស័យ​ធានារ៉ាប់រង​ជូន​ដល់​អ្នកសារព័ត៌មាន​នៅ​កម្ពុជា និង​ការកសាង​បណ្តាញនិង​រក្សា​ទំនាក់ទំនង​ជាមួយ​អ្នកសារព័ត៌មាន និងធនាគារិក ព្រម​ទាំង​រួម​ចំណែក​ដល់​ការ​អភិវឌ្ឍប្រព័ន្ធ​ផ្សព្វផ្សាយ​នៅ​កម្ពុជា​ផងដែរ។

វគ្គបណ្តុះបណ្តាលចាប់ផ្តើមពីចុងខែមីនា រហូតដល់ខែឧសភា ឆ្នាំ២០២៣។ មាតិកាសំខាន់ៗ គ្រប​ដណ្តប់​លើតួនាទីរបស់និយ័តករហិរញ្ញវត្ថុ និងសមាគម បទប្បបញ្ញត្តិ​នៃ​វិស័យ​ធនាគារ​និង​ហិរញ្ញវត្ថុ និងវិស័យធានារ៉ាប់រង វិន័យទីផ្សារ ប្រតិបត្តិការទីផ្សារនៃវិស័យធនាគារ ហិរញ្ញវត្ថុ និង​ធានារ៉ាប់រង ក្រមប្រតិបត្តិសម្រាប់គ្រឹះស្ថានធនាគារ និង​ហិរញ្ញវត្ថុ កិច្ចការពារអតិថិជន ការ​ផ្តល់​ឥណទាន​ប្រកបដោយការទទួលខុសត្រូវ តួនាទី​របស់ប្រព័ន្ធ​ចែករំលែកឥណទាន ក្នុងការ​គាំទ្រ​វិស័យ​ហិរញ្ញវត្ថុ និងអ្នកប្រើប្រាស់កម្ចី បច្ចេកវិទ្យា​ហិរញ្ញវត្ថុ ប្រព័ន្ធ​ទូទាត់ និង​ការណែនាំ​ស្តីពី​បរិស្ថាន សង្គម និង​អភិបាលកិច្ច។

នេះជាលើក​ទីពីរ ដែល​សមាគមធនាគារនៅកម្ពុជា(ABC) សមាគមមីក្រូហិរញ្ញវត្ថុកម្ពុជា (CMA) និង​សមាគម​ធានារ៉ាប់រងកម្ពុជា (IAC) និង​ក្លឹប​អ្នកកាសែតកម្ពុជា បានរៀបចំ​វគ្គបណ្តុះបណ្តាលនេះ ក្រោយ​ពីទទួលបានលទ្ធផលល្អក្នុងឆ្នាំ២០២២។ វគ្គបណ្តុះបណ្តាលក្នុងឆ្នាំ២០២៣ នឹង​ត្រូវបែង​ចែក​ជា​ពីរវគ្គ​ផ្សេងគ្នា ដោយមួយ​វគ្គសម្រាប់​អ្នកសារព័ត៌មានទូទៅ និងមួយវគ្គទៀតសម្រាប់​ការីនិពន្ធ។

វាគ្មិន​ជំនាញៗ មកពីនិយតករ សមាគមវិជ្ជាជីវៈ គ្រឹះស្ថានធនាគារ និងហិរញ្ញវត្ថុ វិនិយោគិន និង​អ្នក​ពាក់ព័ន្ធ នឹង​ចូលរួមធ្វើបទ​បង្ហាញ ចែករំលែក​ទិន្នន័យ និងឆ្លើយសំណួរ​ពាក់ព័ន្ធ ដែល​នឹង​ក្លាយ​ជាប្រភព​ព័ត៌មានល្អៗ សម្រាប់​ការ​ផលិត​មាតិការ​ព័ត៌មាន។ ក្រោយ​បញ្ចប់វគ្គសិក្សា​នៅក្នុង​ថ្នាក់ សិក្ខាកាម​ទាំងពីរក្រុម នឹងត្រូវចុះទស្សនកិច្ចសិក្សាទៅតាម​បណ្តាលខេត្ត ដើម្បី​ស្វែងយល់​ជាក់​ស្តែង​នូវការ​ប្រើប្រាស់​សេវាហិរញ្ញវត្ថុ​នៅ​តាម​សហគមន៍​ផង​ដែរ។

ក្រៅពីការបណ្តុះបណ្តាល​ពង្រឹងចំណេះដឹងមូលដ្ឋានគ្រឹះ​សម្រាប់អ្នកសារព័ត៌មាន សមាគមទាំងបី នឹង​បង្កើត​នូវ​កម្មវិធី​មួយចំនួន ដើម្បីផ្សារ​ភ្ជាប់​ទំនាក់ទំនង​រវាងអ្នកសារព័ត៌មាន និង​ធានាគារិក និង​ធានារ៉ាប់រង​ផង​ដែរ៕