បុរសខ្មែរសញ្ជាតិអាមេរិកម្នាក់រត់ចេញពីមណ្ឌលចត្តាឡីស័ក

មន្ត្រីអ្នកនាំពាក្យក្រសួងសុខាភិបាល បានប្រាប់អ្នកសារព័ត៌មានមុននេះ បន្តិចថា នៅព្រឹកថ្ងៃទី ១៦ ខែមករា នេះ មានករណីបុរសខ្មែរសញ្ជាតិអាមេរិកាំងម្នាក់ បានរត់ចេញពីទីតាំងធ្វើចត្តាឡីស័ក នាសណ្ឋាគារទ្បងលីវ នៅផ្លូវលេខ៣១២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ បន្ទាប់ពីហូបអាហារពេលព្រឹករួច។

អ្នកដំណើររូបនេះ មានឈ្មោះ យឹម សេរីវុទ្ធី អាយុ៣៦ឆ្នាំ បានមកដល់ប្រទេសកម្ពុជា កាលពីថ្ងៃទី១២ ខែមករា ឆ្នាំ២០២១ ដោយក្រុមគ្រូពេទ្យបានយកសំណាកទៅពិនិត្យ ហើយដាក់ឱ្យចត្តាទ្បីស័កនៅសណ្ឋាគារឡងលីវ។

នៅព្រឹកមិញនេះ គាត់បានហូបអាហារពេលព្រឹក នៅក្នុងសណ្ឋាគារ ហើយបានឆ្លៀតឱកាសរត់គេច ក្រោយ​ហូបអាហាររួចតែម្តង។ រហូតមកដល់ពេលនេះ សមត្ថកិច្ចកំពុងស្វែងរក ដើម្បីយកមកធ្វើចត្តាឡីស័កបន្តឡើងវិញ៕