​សណ្ឋាគារ ផ្ទះសំណាក់នៅសៀមរាប​ប្រមាណ ៥០% បើកដំណើរឡើងវិញ​

​សណ្ឋាគារ ផ្ទះសំណាក់ នៅក្នុងក្រុងសៀមរាប ប្រមាណ ៥០ ភាគរយ បានបើកដំណើរការឡើងវិញ​ ខណៈភ្ញៀវទេសចរមានកំណើនល្អប្រសើរ។

លោក ទៀ សីហា អភិបាល នៃគណៈអភិបាលខេត្តសៀមរាប មានប្រសាសន៍នៅថ្ងៃទី ២៩ ខែមីនា ឆ្នាំ ២០២៣នេះថា នៅក្នុងក្រុងសៀមរាប បច្ចុប្បន្នមានសណ្ឋាគារ ផ្ទះសំណាក់ប្រមាណ ៥០ ភាគរយបានបើកដំណើរការឡើងវិញ បន្ទាប់ពីរងផលប៉ះពាល់ដោយសារជំងឺកូវីដ១៩។

លោកអភិបាលខេត្តថ្លែងថា សក្ដានុពលរបស់ខេត្ត ក្នុងឆ្នាំ ២០២៣ គឺនៅតាមបណ្ដាស្រុកជុំវិញក្រុងសៀមរាប មានដូចជា ស្រុកប្រាសាទបាគង ស្រុកសូត្រនិគម ស្រុកពួក និងស្រុកបន្ទាយស្រីជាដើម​សុទ្ធតែជាតំបន់ដែលទទួលបានផលចំណេញពីវិស័យទេសចរណ៍។

លោក ទៀ សីហា ថ្លែងថា៖ «ស្រុកទាំងនេះ​នឹងអាច​មានសក្ដានុពល​ជាងក្រុងសៀមរាបទៅទៀត​ ព្រោះនៅមានដី និងប្រជាពលរដ្ឋដែលប្រកបមុខរបរកសិកម្ម អញ្ចឹងកសិកម្ម​នឹងដើរជាមួយវិស័យទេសចរណ៍​នៅថ្ងៃខាងមុខ​ គួបផ្សំនឹងក្រសួងកសិកម្មកំពុងសិក្សាពីការកាត់បន្ថយថ្លៃដើមផលិត និងទទួលបានតម្លៃបានល្អជាងមុន»។

​

លោក ទៀ សីហា សង្ឃឹមថា សណ្ឋាគារ និងផ្ទះសំណាក់​នឹងបើកដំណើរការ​ ជាពិសេស​គឺ​ព្រឹត្តិការណ៍នានាក្នុងប្រទេស នឹងចូលមកដល់ក្នុងខេត្តសៀមរាប។ ប្រតិបត្តិករទេសចរណ៍ នឹងអាចមានលទ្ធភាពបើកសណ្ឋាគារ ផ្ទះសំណាក់​ធ្វើឱ្យមានតម្រូវការចំណីអាហារ រុញ​ឲ្យ​កើន​ឡើង​ផលកសិកម្មផងដែរ។​

ខេត្តសៀមរាបទទួលបានទេសចរណ៍អន្តរជាតិត្រឡប់មកវិញប្រមាណជាង ២០ ម៉ឺននាក់ ក្នុងឆ្នាំ ២០២២ ដែលនេះជាសញ្ញាល្អ ខណៈចំណូល​ និងសេដ្ឋកិច្ច​ក្នុងខេត្តកំពុងតែវិល​ត្រឡប់មករកប្រក្រតីភាពវិញ​៕