ខេត្តសៀមរាប ទទួលបានជើងហោះហើរចន្លោះ ១៥ទៅ១៩ជើង និងទេសចរអន្តរជាតិជាង ២ពាន់នាក់ ក្នុងមួយថ្ងៃ

ក្រោយពីរាជរដ្ឋាភិបាល គ្រប់គ្រងនូវការរីករាលដាលជំងឺកូវីដ-១៩ បានយ៉ាងល្អប្រសើរ ធ្វើឱ្យកំណើនភ្ញៀវទេសចរ​អន្តរជាតិ ចូលទៅកម្សាន្តនៅខេត្តសៀមរាបមានការកើនឡើងជាលំដាប់។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឱ្យដឹងថា ក្នុងមួយថ្ងៃខេត្តសៀមរាបទទួលបាន​ជើងហោះហើរប្រមាណ ១៥ទៅ ១៩ជើង និងមានភ្ញៀវទេសចរអន្តរជាតិជាង ២ពាន់នាក់ ចូលទៅកម្សាន្តរៀង​រាល់ថ្ងៃនៅរមណីយដ្ឋានអង្គរ។

បើតាមលោក ង៉ូវ សេងកាក់ ចំពោះទេសចរអន្តរជាតិ ដែលចូលមកខេត្តសៀមរាបនេះ មានមកពីប្រទេសម៉ាឡេស៊ី វៀតណាម ឡាវ សាំងហ្គាពួ កូឡាឡាំពួ និងប្រទេសផ្សេងៗមួយចំនួនទៀត។​

លោកមើលឃើញថា បន្ទាប់ពីព្រលានយន្តហោះអន្តរជាតិថ្មី ដាក់ឱ្យដំណើរការនៅខែ តុលា ខាងមុខ កំណើនភ្ញៀវ​ទេសចរ នឹងកាន់តែកើនឡើងខ្ពស់ថែមទៀត។ លោក បានលើកឡើងដូច្នេះថា« យើងធ្លាប់ទទួលបានភ្ញៀវទេសចរ​អន្តរជាតិចូលមកលេងនៅខេត្តសៀមរាបច្រើននៅជាងគេ គឺជាង ២លាន ៦សែននាក់ នាពេលកន្លងទៅ»។

ប្រធានមន្ទីរទេសចរណ៍រូបនេះ បានដាក់ក្តីរំពឹងថា ចាប់ពីឆ្នាំ ២០២៦ឡើងទៅ ចំនួនភ្ញៀវទេសចរនឹងកើនឡើង​ខ្ពស់ជាបន្តបន្ទាប់ ស្របពេលដែលខេត្តសម្បូរទៅដោយតំបន់ទេសចរណ៍វប្បធម៌ ប្រវត្តិសាស្រ្ត និងប្រាសាទមួយនេះ មានការអភិវឌ្ឍហេដ្ឋារចនាសម្ព័ន្ធ ជាច្រើននៅគ្រប់ទីកន្លែងនៃខេត្ត។

សូមបញ្ជាក់ថា ការលើកឡើងរបស់លោក ង៉ូវ សេងកាក់ ប្រធានមន្តីរទេសចរណ៍បែបនេះ ធ្វើឡើងនៅក្នុងសន្និសីទ​សារព័ត៌មានស្តីពី ភាពជោគជ័យរយៈពេល ៥ឆ្នាំ របស់ខេត្តសៀមរាប នាព្រឹកថ្ងៃទី ២៩ មីនា នៅទីស្តីការគណៈរដ្ឋមន្រ្តី៕