អតីតបុគ្គលិកវិទ្យុ VOD ១១ រូប នឹងចូលបម្រើការងារនៅក្រសួងកសិកម្មឆាប់ៗនេះ

អតីតបុគ្គលិករបស់វិទ្យុ VOD ចំនួន ១១ រូប នឹងចូលបម្រើការក្នុងក្រសួងកសិកម្ម រុក្ខាប្រមាញ់ និងនេសាទ ឆាប់ៗនេះ។ នេះបើតាមការឱ្យដឹងពីលោកក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។

នៅថ្ងៃទី ២៩ ខែមីនា ឆ្នាំ ២០២៣នេះ លោក ឌិត ទីណា បានបង្ហោះនៅលើទំព័រហ្វេសបុកផ្លូវការរបស់លោកថា សូមស្វាគមន៍អតីតបុគ្គលិកនៃ វិទ្យុ VOD ទាំង ១១រូប ដែលនឹងចូលមកបម្រើការងារនៅក្រសួងកសិកម្ម រុក្ខាប្រមាញ់ និងនេសាទ នាពេលដ៍ខ្លីខាងមុខនេះ។

លោករដ្ឋមន្ត្រីសង្ឃឹមថា តាមរយៈចំណេះជំនាញរបស់អ្នកទាំង ១១ រូប នឹងអាចដើរលើមាគ៌ារួមមួយ ដើម្បីជួយវិស័យកសិកម្មរបស់យើងឱ្យកាន់តែរឹងមាំនិងខ្លាំងក្លា។

សូមរម្លឹកថា វិទ្យុ VOD ត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជា បញ្ជាឱ្យក្រសួងព័ត៌មានដកអាជ្ញាប័ណ្ណនៅថ្ងៃទី ២៣ ខែកុម្ភៈ ឆ្នាំ២០២៣ បន្ទាប់ពីចុះផ្សាយព័ត៌មាន មិនពិតថា ឯកឧត្តម ហ៊ុន ម៉ាណែត ចុះហត្ថលេខាជំនួសសម្តេចតេជោ ហ៊ុន សែន ក្នុងការផ្តល់ជំនួយទៅប្រទេសតួកគី។

ក្រោយការដកអាជ្ញាប័ណ្ណ សម្តេចតេជោ ហ៊ុន សែន បានសម្រេចផ្តល់ការងារ​ក្របខណ្ឌរដ្ឋជូនដល់អតីតបុគ្គលិក VOD ដើម្បីសម្រួលការលំបាករបស់ពួកគេផងដែរ៕

ដោយ៖ អុន ​ស្រីមាន