​គម្រោងដេញថ្លៃផ្លូវបេតុងអាមេចំនួន ៦ ខ្សែ នៅស្រុកស្ទឹងត្រង់មានភាពមិនប្រក្រតី​

រដ្ឋបាលស្រុកស្ទឹងត្រង់នាចុងសប្ដាហ៍កន្លងមក​បានរៀបចំដាក់ឲ្យដេញថ្លៃគម្រោង​ផ្លូវ​បេតុង​អាមេចំនួន ៦ ខ្សែ ស្ថិតនៅក្នុងឃុំចំនួន ៦ នៃស្រុកស្ទឹងត្រង់។ ​

ប្រជាពលរដ្ឋមូលដ្ឋានបានរិះគន់ថា ការដេញថ្លៃគឺគ្រាន់តែធ្វើឡើងបង្គ្រប់កិច្ចប៉ុណ្ណោះ ដោយផ្តល់អំណាច​ដល់អ្នកកាន់ប៊ីតមួយចំនួនធំដែលមិនបានបញ្ចេញដេញថ្លៃ ហើយឈរចាំតែទទួលផល​ថ្លៃទឹកតែ​ប៉ុណ្ណោះ ដោយបានយកថវិកា​របស់រដ្ឋយកមកចែកគ្នា។

​ជុំវិញការចែកទឹកតែក្រោមការរៀបទន្លាប់ចាស់បានធ្វើឱ្យប៉ះពាល់​ដល់​ស្មារតីប្រជាពលរដ្ឋដែលមិនបានចូលរួមក្នុងពិធី​ដេញថ្លៃនេះ ហើយចាំទទួលយកលទ្ធផលផ្លូវគ្មាន​គុណភាពបន្ទាប់ពីគេយកលុយរដ្ឋ ១០ ភាគរយមកចាយក្នុងផលប្រយោជន៍សួនតួនោះ។ ​

ការដេញនេះគ្មានការប្រកួតប្រជែងបែបទីផ្សារសេរីនោះទេ គឺការដេញតម្លៃប៉ាន់ស្មាន និងតម្លៃដែល​ទទួលយកបានខុសគ្នាតិចតួចតែប៉ុណ្ណោះ “ទាំង៦ឃុំ” បើប្រៀបធៀបជាមួយស្រុកព្រៃឈរមានភាពខុសគ្នាឆ្ងាយ គម្រោងដេញថ្លៃនៅស្រុកព្រៃឈររដ្ឋចំណេញថវិកា ខណៈការដេញនៅស្រុក​ស្ទឹងត្រង់រដ្ឋ​មិនចំណេញថវិកាអ្វីនោះទេ។

ឃុំទាំង ៦ នោះរួម​មាន ១.ឃុំអារក្សត្នោត គម្រោងសាងសង់ផ្លូវបេតុងអាមេប្រវែង ៥០០ ម៉ែត្រ ទទឹងប្រវែង៤ម៉ែត្រ តម្លៃប៉ាន់ស្មាន ២៦០ លានរៀន បានទៅក្រុមហ៊ុន ម៉ៅ អេងជឺ មានតម្លៃដេញទទួលយកបាន ២៥៧ លានរៀល។ ២.ឃុំខ្ពបតាងួន គម្រោងសាងសង់ផ្លូវបេតុងអាមេប្រវែង ៤៥០ ម៉ែត្រ ទទឹងប្រវែង ៤ ម៉ែត្រ មានតម្លៃប៉ាន់ស្មាន ២៣៤​លានរៀល បានទៅក្រុមហ៊ុន កេត សុខគាង តម្លៃដេញទទួលយកបាន ២២៥លានរៀល។

៣.ឃុំព្រះអណ្តូង គម្រោង​សាងសង់ផ្លូវបេតុងអាមេប្រវែង៣០០ម៉ែត្រ ទទឹង៤ម៉ែត្រ តម្លៃប៉ាន់ស្មាន ១៥៦ លានរៀល បានទៅក្រុមហ៊ុន កេត សុខគាង មានតម្លៃដេញទទួលយកបាន ១៥២លានរៀល។ ៤.ឃុំពាមកោះស្នា គម្រោងសាងសង់ផ្លូវបេតុងអាមេប្រវែង៤០០ម៉ែត្រ ទទឹង៤ម៉ែត្រ មានតម្លៃប៉ាន់ស្មាន ២០៨លានរៀល បានទៅក្រុមហ៊ុន ហួត ឆៃលីម មានតម្លៃដេញទទួលយកបាន ២០៣លានរៀល។

(រូបតំណាង)

៥.ឃុំព្រែកបាក់ គម្រោងសាងសង់ផ្លូវបេតុងអាមេប្រវែង ៤៥០ ម៉ែត្រ ទទឹងប្រវែង៤មែត្រ មានតម្លៃប៉ាន់ស្មាន ២៣៣​លានរៀល បានទៅក្រុមហ៊ុន អ៊ូ លាងហុង តម្លៃដេញទទួលយកបាន ២២៧លានរៀល។ និងទី៦.ឃុំទួលព្រះឃ្មាំង គម្រោងសាងសង់ផ្លូវបេតុងអាមេប្រវែង៣០០ម៉ែត្រ ទទឹងប្រវែង៤ម៉ែត្រ មានតម្លៃប៉ាន់ស្មាន ១៩៥ លានរៀល បានទៅក្រុមហ៊ុន អ៉ឹង ចាន់ឡា តម្លៃដេញទទួលយកបាន ១៩២លានរៀល។

មហាជនក៏បានបានសំណូមពរដល់ រដ្ឋបាល​ស្រុកស្ទឹងត្រង់ លោកនាយករងរដ្ឋបាលសាលាខេត្ត និងគណៈកម្មការលទ្ធកម្ម គួរពិនិត្យបញ្ជីវត្តមានឯកសារអ្នកដេញមានច្រើននាក់ ពេលដេញផ្ទុយស្រឡះពីបញ្ជីចុះវត្តមាន៕

អត្ថបទ៖ សាន វិឡែម