ព័ត៌មានជាតិ

ខេត្តរតនគិរីបម្រុងដីជាង ១៤០០ ហិកតា នៅស្រុកលំផាត់ទុកសាងសង់ព្រលានយន្តហោះថ្មី

បានផុស

២ years មុន

នៅ

ថ្ងៃអង្គារ ៤ មេសា ២០២៣

ដោយ

Dy Bunnara

ខេត្តរតនគិរីបានបម្រុងដីជាង ១៤០០ ហិកតានៅស្រុកលំផាត់ដើម្បីទុកវិនិយោគសាងសង់ព្រលានយន្តហោះថ្មី។

លោក ញ៉ែម សំអឿន អភិបាលនៃគណៈអភិបាលខេត្តរតនគីរីបានថ្លែងនៅក្នុងសន្និសីទនៅព្រឹកនេះថា វិស័យសក្តានុពលរបស់ខេត្តរតនគីរីមាន ៣ គឺទេសចរណ៍ ធនធានរ៉េ និងកសិឧស្សាហកម្ម។ ខណៈវិស័យទេសចរណ៍ជាមុខព្រួញដែលរដ្ឋបាលខេត្តយកចិត្តទុកដាក់ជាងគេ និងបានខិតខំកៀរគររកដៃគូវិនិយោគពីក្រៅមកអភិវឌ្ឍក្នុងខេត្ត។

»ក្នុងពេលជួបជាមួយអ្នកវិនិយោគបរទេសម្តងៗ គេតែងតែសួរថា តើខេត្តរតនគីរីមានព្រលានយន្តហោះហើយឬនៅ? រដ្ឋបាលខេត្តពិតជាចង់រកដៃគូវិនិយោគ ដើម្បីឲ្យគម្រោងព្រលានយន្តហោះក្នុងខេត្តលេចចេញជារូបរាង ដែលនឹងរុញកំណើនការអភិវឌ្ឍរបស់ខេត្តភាគឦសាននេះ»។

លោកបន្តថា នៅស្រុកលំផាត់ដែលមានចម្ងាយជាង ១០០ គីឡូម៉ែត្រពីក្រុងបានលុង ខេត្តបានបម្រុងដីជាង ១៤០០ ហិកតា សម្រាប់ទុកសាងសង់ព្រលានយន្តហោះថ្មី ខណៈដែលព្រលានចាស់ក្នុងក្រុងមិនអាចប្រើប្រាស់បានទៀតទេ ដោយសារវាកៀកទីប្រជុំជន ដែលឆាប់ៗខាងមុខអាជ្ញាធរគ្រោងនឹងកែប្រែជាសួនកម្សាន្តសម្រាប់ទាក់ទាញអ្នកទេសចរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងទីតាំងព្រលានយន្តហោះថ្មី លោកអភិបាលខេត្តបានបញ្ជាក់ថា នៅចន្លោះរវាងខេត្តមណ្ឌលគិរី ស្ទឹងត្រែង ក្រចេះ និងខេត្តរតនគិរី ហើយរដ្ឋបាលខេត្តក៏អំពាវនាវរកដៃគូវិនិយោគដើម្បីឲ្យគម្រោងព្រលានយន្តហោះនេះអាចលេចចេញជារូបរាងនៅពេលអនាគត។

ខេត្តរតនគីរីមានព្រលានយន្តហោះចាស់មួយនៅក្រុងបានលុង ដែលសាងសង់ឡើងតាំងពីចុងទសវត្សរ៍ឆ្នាំ ១៩៦០។បច្ចុប្បន្នព្រលានយន្តហោះនេះបានផ្អាកដំណើរការទាំងស្រុង។ បើតាមអភិបាលខេត្តរតនគិរី ទីតាំងព្រលានយន្តហោះចាស់នេះ គ្រោងអភិវឌ្ឍជាសួនកម្សាន្តដ៏ធំមួយនៅពេលដ៏ខ្លីខាងមុខនេះសម្រាប់ទាក់ទាញអ្នកទេសចរ៕