ព័ត៌មានជាតិ

អ្នកទេសចរបង្ហាញការគាំទ្រនូវព្រឹត្ដិការណ៍អង្គរសង្ក្រាន្ដគម្រប់ខួប១០ឆ្នាំ

បានផុស

២ years មុន

នៅ

ថ្ងៃពុធ ៥ មេសា ២០២៣

ដោយ

សៀមរាប ៖ ខណៈដែលក្រុមការងារអង្គរសង្ក្រាន្ដ បាននឹងកំពុងមមាញឹកក្នុងតុបតែងលម្អរនូវសំណង់ កម្មវិធីអង្គរសង្ក្រាន្ដ នីមួយៗ អ្នកទេសចរមួយចំនួន បានសម្ដែងការរីករាយនិងគាំទ្រយ៉ាងខ្លាំង ដោយត្រៀមចូលរួមកំសាន្ដនូវព្រឹត្ដិការណ៍នេះ។ ពួកគាត់លើកឡើងថា មហាព្រឹត្ដិការណ៍នេះ នឹងទាក់ទាញអ្នកទេសចរព្រមទាំងបានលើកកម្ពស់នូវវប្បធម៌ អរិយធម៌របស់ខ្មែរ កាន់តែខ្ពស់នៅលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកទេសចរមកពីខេត្ដបន្ទាយមានជ័យលោក តាំង ភីងភីង បានលើកឡើងថា ព្រឹត្ដិការណ៍អង្គរសង្ក្រាន្ដឆ្នាំ២០២៣នេះ គឺជាមោទនភាពជាតិមួយ ដែលភ្ញៀវទេសចរជាតិ និងអន្ដរជាតិបានស្វែងយល់នូវវប្បធម៌និងអរិយធម៌កាន់តែច្បាស់ ព្រោះព្រឹត្ដិការណ៍បានបង្ហាញនូវស្នាដៃដ៏អស្ចារ្យរបស់ខ្មែរ ស្របពេលដែលតំបន់អង្គរក៏មានការរៀបចំស្រស់ស្អាតទាំងបរិស្ថាន អនាម័យ និងសណ្ដាប់ធ្នាប់។

លោកបន្ដថា ប្រពៃណី វប្បធម៌ខ្មែរនឹងបានល្បីល្បាញទៅលើឆាកអន្ដរជាតិផងដែរ។ ជាមួយគ្នានោះ ការបង្កើតនូវព្រឹត្ដិការណ៍នេះនឹងនាំមកនូវសេដ្ឋកិច្ចដល់ប្រជាពលរដ្ឋនៅមូលដ្ឋានផងដែរ។

ដោយឡែកអ្នកទេសចរពីររូបទៀតមកពីខេត្ដកំពត និងខេត្ដបន្ទាយមានជ័យ ក៏បានឱ្យដឹងស្រដៀងគ្នាដែរថា ទោះបីពួកគាត់មិនទាន់កំណត់ថា ចូលរួមកំសាន្ដសប្បាយក្នុងព្រឹត្ដិការណ៍អង្គរសង្ក្រាន្ដក្ដី ក៏ប៉ុន្ដែមើលការរៀបចំតុងតែងក៏មានចិត្ដរំភើប និងសប្បាយដែរ ព្រោះថាទីតាំងកម្មវិធីនៃព្រឹត្ដិការណ៍នេះ បង្ហាញនូវកេរតំណែលដូចតាខ្មែរ។

ពួកគាត់បានថ្លែងអំណរគុណដល់រាជរដ្ឋាភិបាលដែលបានបង្កើតកម្មវិធីព្រឹត្ដិការណ៍អង្គរសង្ដ្រាន្ដដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ ដែលបង្ហាញថា កម្ពុជាកំពុងមានការអភិវឌ្ឍជឿនលឿនពីមួយឆ្នាំទៅមួយឆ្នាំ។

សូមជម្រាបថា ព្រឹត្តិការណ៍អង្គរសង្ក្រាន្តគម្រប់ខួប១០ឆ្នាំនេះ នឹងចាប់ផ្ដើមចាប់ពីថ្ងៃទី១៣ដល់ថ្ងៃទី១៦ខែមេសា ដែលធ្វើឡើងក្រោមប្រធានបទ “ក្តីស្រមៃ និងក្តីសង្ឃឹម” ដោយមានកម្មវិធីកំសាន្ដជាច្រើន រួមមមាន កម្មវិធីភូមិបេតិកភណ្ឌវប្បធម៌ កម្មវិធីភូមិវិចិត្រករឯក កម្មវិធីសួនញញឹមអង្គរ កម្មវិធីរបាំបុរាណ ប្រពៃណី និងល្បែងប្រជាប្រិយ កម្មវិធីប្រកួតអុកចត្រង្គ កម្មវិធីគោមបណ្ដែតទឹក កម្មវិធីគុនល្បុកតោ កម្មវិធីអាហារនៃក្ដីស្រលាញ់ កម្មវិធីពិព័រណ៍សង្ក្រាន្ដ កម្មវិធីភូមិខ្ញុំ កម្មវិធីផ្ទះស៊ីហ្គេម និងអាស៊ានប៉ារ៉ាហ្គេម កម្មវិធី “នេះមិនមែនជាសុបិន”កម្មវិធី”សួនមុនីហទ័យជាដើម។ព្រឹត្ដិការណ៍នេះ មានគោលបំណងបង្កើនភាពសប្បាយរីករាយដល់មហាគ្រួសារខ្មែរ ដោយមិនប្រកាន់និន្នាការនយោបាយ ឬសាសនា ពណ៌សម្បុរ អ្វីទាំងអស់។

ជាមួយគ្នានេះ ព្រឹត្តិការណ៍នេះ ក៏បានគាស់រំលើងនូវល្បែងល្បាំប្រជាប្រិយខ្មែរនានាដែលធ្លាប់មានពីមុនមកឲ្យយុវជនជំនាន់ក្រោយបានស្គាល់។ ក្រៅពីនេះ ព្រឹត្តិការណ៍អង្គរសង្ក្រាន្តក៏នឹងនាំចំណូលជូនបងប្អូនប្រជាពលរដ្ឋក្នុងខេត្តសៀមរាបផងដែរ៕

ដោយ ៖ គឿនវេត