លោក មួង ធី ត្រូវបានប្រមុខរាជរដ្ឋាភិបាលតែងតាំងជាអភិបាលស្រុកសាមគ្គីមុនីជ័យ

លោក មួង ធី ត្រូវបានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ចេញអនុក្រឹត្យតែងតាំងជាអភិបាលស្រុកសាមគ្គីមុនីជ័យ ដែលជាស្រុកបំបែកថ្មី។  

កាលពីថ្ងៃទី ២២ ខែធ្នូ ឆ្នាំ ២០២២កន្លងទៅនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញអនុក្រឹត្យ ស្ដីពី ការបំបែកស្រុកឧដុង្គ នៃខេត្តកំពង់ស្ពឺ។ តាមអនុក្រឹត្យនេះ គឺត្រូវបានបំបែកស្រុកឧដុង្គ ជា ២ គឺក្រុងឧដុង្គម៉ែជ័យ និងស្រុកសាមគ្គីមុនីជ័យ នៃខេត្តកំពង់ស្ពឺ ដូចខាងក្រោម៖

១. ក្រុងឧដុង្គម៉ែជ័យ ដោយកាត់យកឃុំចំនួន ៥ គឺឃុំវាំងចាស់ ឃុំវាលពង់ ឃុំត្រាចទង ឃុំព្រះស្រែ និងឃុំក្សេមក្សាន្ដ ពីស្រុកឧដុង្គ ខេត្តកំពង់ស្ពឺ។

២. ស្រុកសាមគ្គីមុនីជ័យ ដោយកាត់យកឃុំចំនួន ១០គឺ ឃុំចាន់សែន ឃុំជើងរាស់ ឃុំជំពូព្រឹក្ស ឃុំក្រាំងចេក ឃុំមានជ័យ ឃុំព្រៃក្រសាំង ឃុំយុទ្ធសាមគ្គី ឃុំដំណាក់រាំង ឃុំពាំងល្វា និងឃុំភ្នំតូច ពីស្រុកឧដុង្គ ខេត្តកំពង់ស្ពឺ។

នៅថ្ងៃទី ៦ ខែមេសា ឆ្នាំ ២០២៣នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញអនុក្រឹត្យតែងតាំងលោក មួង ធី ឋានន្ដរស័ក្តិវរមន្ត្រី ថ្នាក់លេខ ៣ ជាអភិបាល នៃគណៈអភិបាលស្រុកសាមគ្គីមុនីជ័យ។

លោក មួង ធី ធ្លាប់ជាអភិបាលស្រុកឱរ៉ាល់ ហើយនៅថ្ងៃទី ១៦ ខែសីហា ឆ្នាំ ២០២១ លោកត្រូវបានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ចេញអនុក្រឹត្យផ្ទេរពីអភិបាលស្រុកឱរ៉ាល់ ឲ្យទៅកាន់មុខតំណែងជាអភិបាលស្រុកឧដុង្គ នៃខេត្តកំពង់ស្ពឺ៕