ព័ត៌មានជាតិ

កាកាវដាំដុះក្នុងខេត្តមណ្ឌលគិរី អាចនាំចេញទៅទីផ្សារប្រទេសអឺរ៉ុប ៣ ប្រទេស

បានផុស

២ years មុន

នៅ

ថ្ងៃព្រហស្បតិ៍ ៦ មេសា ២០២៣

ដោយ

បើតាមលោក ស៊ន សារុន អភិបាលរងខេត្តមណ្ឌលគិរី ក្នុងសន្និសីទនាព្រឹកមិញនេះបានឱ្យដឹងថា ដំណាំកាកាវ ដែលបានដាំដុះនៅក្នុងខេត្ត បើតាមក្រុមហ៊ុនដែលចូលមកវិនិយោគ កាកាវដែលផលិតបាន ត្រូវបាននាំចេញទៅកាន់ទីផ្សារក្រៅប្រទេសចំនួន ៣ដូចជា បារាំង ហ្វាំងឡង់ និងអាល្លឺម៉ង់ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ន សារុន បានលើកឡើងថា នៅក្នុងខេត្តមណ្ឌលគិរី មានក្រុមហ៊ុនមួយឈ្មោះថា ក្រុមហ៊ុន កាំកាវ ដែលចូលមកវិនិយោគ ហើយបានប្រមូលផ្តុំចងក្រងជាបណ្តុំកសិករ ដោយបានផ្តល់នៅគ្រាប់ពូជសម្រាប់កសិករដាំដុះដំណាំកាកាវ ព្រមទាំងប្រមូលទិញទៅយកវិញ នៅពេលរដូវប្រមូលផលកាកាវបានមកដល់។

បើគិតមកដល់ពេលបច្ចុប្បន្ននេះ ផ្ទៃដីដាំដុះដំណាំកាកាវ នៅក្នុងខេត្តមណ្ឌលគិរី ទោះបីជាផ្ទៃដីដាំដុះ មានចំនួនច្រើនក៏ពិតមែន ប៉ុន្តែការប្រមូលផលកាកាវ នៅមានចំនួនតិចតួចនៅឡើយ ហើយចំពោះការផ្គត់ផ្គង់ទៅកាន់ទីផ្សារក៏នៅមិនទាន់បានគ្រប់គ្រាន់។

លោកអភិបាលរងខេត្តបន្ថែមទៀតថា «សម្រាប់ការនាំចេញ ក៏ដូចជាការប្រមូលទិញផលកាកាវនេះ ក្រុមហ៊ុនដែលបានទិញយកកាកាវ ពួកគេនឹងធ្វើការកែច្នៃ វេច ខ្ចប់ ឱ្បបានស្អាតចេញ ជាផលិតផលសម្រេចជាមុនសិន ទើបធ្វើការនាំចេញទៅកាន់ទីផ្សារក្រៅប្រទេសចំនួន ៣ដូចជា បារាំង ហ្វាំងឡង់ និងអាល្លឺម៉ង់ ផងដែរ និងអាចនៅមានប្រទេសមួយចំនួនទៀត»។

លោក សុខ ឃាង ប្រធានមន្ទីរកសិកម្ម រុក្ខាប្រមាញ់ និងនេសាទ បានលម្អិតបន្ថែមថា ពាក់ព័ន្ធទៅហ្នឹងដំណាំកាកាវ នៅក្នុងខេត្តមណ្ឌលគិរី បច្ចុប្បន្នមានផ្ទៃដីដាំដុះប្រមាណតែ ៧២ហិតា ប៉ុណ្ណោះ។ ដោយឡែក ចំពោះបរិមាណផលដែលប្រមូលបាននៅមានចំនួនតិចតួច ដូច្នេះការនាំចេញទៅទីផ្សារក្រៅប្រទេស បន្ទាប់ពីប្រទេសទាំង ៣ខាងលើ បារាំង ហ្វាំងឡង់ និងអាល្លឺម៉ង់ នោះ ទិន្នផលកាកាវ ក៏មានការនាំចេញបន្តិចបន្តួចទៅកាន់ប្រទេស ជប៉ុន និងម៉ាឡេស៊ី តិចតួចបន្ថែមទៀតផងដែរ៕