រដ្ឋបាលខេត្តកំពង់ឆ្នាំង​ឱ្យអ្នកចិញ្ចឹមត្រី​ក្នុងបែបម្លាស់ទី​ទៅតំបន់ទឹកជ្រៅបញ្ចៀសត្រីងាប់

បន្ទាប់ពីមានករណីត្រីចិញ្ចឹមក្នុងបែងាប់នៅក្រុងកំពង់ឆ្នាំងនាប៉ុន្មានថ្ងៃកន្លងមកនេះ រដ្ឋបាលខេត្តកំពង់ឆ្នាំង បានសម្រេចអនុញ្ញាតឱ្យម្ចាស់បែបម្លាស់ទីទៅតំន់ទឹកជ្រៅ។

ត្រីចិញ្ចឹមក្នុងបែបានចាប់ផ្ដើមងាប់ចាប់ពីថ្ងៃទី ១ ដល់ថ្ងៃទី ៤ ខែមេសា ដោយសារអាកាសធាតុក្ដៅ និងមានភ្លៀងធ្លាក់មួយមេធំ ធ្វើឱ្យទឹកទន្លេជូ ដែលនាំឱ្យប៉ះពាល់ដល់ត្រី។ នេះបើតាមការអះអាង របស់លោក ស៊ុន សុវណ្ណរិទ្ធិ អភិបាល នៃគណៈអភិបាល ខេត្តកំពង់ឆ្នាំង។

លោក ស៊ុន សុវណ្ណរិទ្ធិប្រាប់ថា៖ «កាលណាទឹកវាក្ដៅខ្លាំងពេក​ ខែ ៤ អញ្ចឹងវាធ្វើឱ្យទឹកជូ​ វាធ្វើឱ្យប៉ះពាល់ដល់ត្រី។ ខែនេះ អ្នកណាបម្លាស់ទីទៅទឹកជ្រៅឱ្យទាន់ទៅ វាមិនអីទេ ខណៈខេត្ត​ឱ្យបម្លាស់ទីទៅទឹកជ្រៅ»។

ប្រភពព័ត៌មានដែលកម្ពុជាថ្មីទទួលបានថា មានត្រីប្រមាណ ៤០០ តោនបានងាប់ដោយសារ អាកាសធាតុក្ដៅ ចាប់ពីថ្ងៃទី ១ ដល់ថ្ងៃទី ៤ ខែមេសា។ ប៉ុន្តែលោកអភិបាលខេត្តកំពង់ឆ្នាំងអះអាង​បញ្ជាក់ថា ​ត្រីតាមបែដែលងាប់មានចំនួនតិចតូចប៉ុណ្ណោះ មិនដល់ខ្ទង់រយតោននោះទេ៕