ព័ត៌មានជាតិ

ខេត្តបាត់ដំបង កំពុងមមាញឹកតុបតែង រៀបចំអ្វីប្លែកៗ ដើម្បីទទួលសង្ក្រាន្តឆ្នាំថ្មី

បានផុស

២ years មុន

នៅ

ថ្ងៃចន្ទ ១០ មេសា ២០២៣

ដោយ

មួយរយៈចុងក្រោយនេះ រដ្ឋបាលខេត្តបាត់ដំបង និងសហភាពសហព័ន្ធយុវជនកម្ពុជា ខេត្តបាត់ដំបង បានប្រឹងប្រែងជាមួយក្រុមជំនាញៗ ក្នុងការរៀបចំ តុបតែង នូវភ្លើងចម្រុះពណ៌ និងរបស់របរប្លែកៗ ដើម្បីយកមកដាក់តាំងលម្អ នាឱកាសសង្ក្រាន្តឆ្នាំថ្មី ឆ្នាំ ២០២១៣ ដែលកាន់តែខិតចូលមកដល់នាពេលដ៏ខ្លីខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងខេត្តបាត់ដំបង ប៉ុន្មានថ្ងៃនេះ គេសង្កេតឃើញថា តាមបណ្ដាសាលារៀន និងវត្តអារាមនានា បានបង្កើតនូវល្បែងប្រជាប្រិយ ដើម្បីលេងកម្សាន្ត ដែលល្បែងប្រជាប្រិយបុរាណខ្មែរត្រូវបានអាក់ខានរយៈពេល ២ ឆ្នាំ ដោយសារការរាតត្បាត នៃជំងឺកូវីដ-១៩។

ក្រៅពីការរៀបចំភ្លើងចម្រុះពណ៌របស់រដ្ឋបាលខេត្ត ទៅតាមទីប្រជុំជននានា ក៏នៅមានការតុបតែងអ្វីដែលប្លែកៗ ពីសំណាក់សហភាពសហព័ន្ធយុវជនកម្ពុជា ខេត្តបាត់ដំបង ផងដែរ ដែលមានទីតាំងនៅក្នុងវិទ្យាល័យ នេតយ៉ង់ ដើម្បីទទួលសង្ក្រាន្តឆ្នាំថ្មី និងដើម្បីឲ្យពលរដ្ឋដែលមកពីគ្រប់ទិសទីចូលមកកម្សាន្តផង។

ដោយឡែកនៅតាមតំបន់រមណីយដ្ឋានជាច្រើនក្នុងខេត្ត ក៏មានការរៀបចំយ៉ាងស្រស់ស្អាតផងដែរ ពីសំណាក់មន្ទីរទេសចរខេត្ត ក្នុងការរួមចំណែកទាក់ទាញភ្ញៀវទេសចរជាតិ និងអន្តរជាតិ ឲ្យចូលទៅកម្សាន្តនាឱកាសចូលឆ្នាំខាងមុខនេះ ដោយគេរំពឹងថា ឆ្នាំនេះ ភ្ញៀវទេសចរអាចនឹងចូលមកកម្សាន្តច្រើនជាងឆ្នាំមុនៗ៕

អត្ថបទ ៖ សោ និយមរ័ត្ន