គ្រឿងរណ្ដាប់សែនទទួលទេវតាលក់ដាច់ច្រើន​ ធ្វើឱ្យអាជីវករសប្បាយចិត្ត

បងប្អូនអាជីវករលក់រណ្តាប់សែនទទួលទេវតា និងលក់គ្រឿងតុបតែងផ្ទះសប្បាយចិត្ត​ និងទទួលបាន​ប្រាក់​ចំណេញលើសឆ្នាំកន្លងទៅ។

លោកយាយ គួន ហៀង ជាអាជីវករលក់គ្រឿងតុបតែងផ្ទះ​បានឲ្យដឹងថា​ ឆ្នាំនេះអាជីវករសឹងគ្រប់រូប​នៅផ្សារច្បារអំពៅសប្បាយចិត្តខ្លាំងជាងរាល់ឆ្នាំព្រោះសម្បូរម៉ូយមកកម្ម៉ង់ទិញគ្រឿងតុបតែងផ្ទះ និងគ្រឿងរណ្តាប់ទទួលទេវតាដូចជា បាយសី ស្លាធម៌ និងរណ្តាប់សែនច្រើនមុខទៀត។

លោកយាយបន្តថា ឆ្នាំនេះលក់ដាច់ខ្លាំងគឺដោយសារឆ្នាំនេះនៅតាមទីអារាម សាលារៀន ក្រសួងមន្ទីរ ក្រុមហ៊ុនឯកជន ពិសេស តាមបណ្តាអង្គភាពរដ្ឋសុទ្ធសឹងរៀបចំធ្វើពិធីសង្ក្រានឆ្នាំថ្មីសឹងគ្រប់កន្លែងទាំងអស់ខុសប្លែករាល់ឆ្នាំ។

ដោយឡែកបងស្រី ហុក គឹមសៀន ដែលទទួលធ្វើបាយសី និងគ្រឿងរណ្តាប់សម្រាប់សែនបាននិយាយថា ឆ្នាំនេះបងស្រីធ្វើសឹងមិនទាន់ឲ្យអ្នកកម្ម៉ង់ទិញនៅតាមបណ្តាផ្សារពិសេសទីអារាមព្រោះខុសប្លែករាល់ឆ្នាំច្រើនតែតុបតែងតាមផ្ទះហើយឆ្នាំនេះស្រាប់តែរៀបពិធីទទួលទេវតាគ្រប់បណ្តាស្ថាបនរដ្ឋ និងឯកជនដោយទាំងសាលារដ្ឋ និងឯកជនទៀតផង។

បើតាមការអះអាងពីលោក គ្រី ហ៊ុច អនុប្រធានផ្សារច្បារអំពៅបានឲ្យដឹងថា ឆ្នាំនេះបងប្អូនអាជីវករលក់ដូរក្នុងផ្សាររីករាយនិងលក់ដូរដាច់មិននឹកស្មានទាល់តែសោះ។

អ្វីដែលបងប្អូនអាជីវករលោកពេញចិត្តគឺរបស់របរដែលលក់ដាច់លើសលុបគឺសុទ្ធសឹងជាគ្រឿងរណ្តាប់សែនដែលប្រជាពលរដ្ឋខ្មែរយើងលោកឆ្នៃប្រឌឹតធ្វើលក់ដោយពុំចាំបាច់នាំចូលពីក្រៅប្រទេស។ ប៉ុន្តែទោះជាយ៉ាងណាក៏បងប្អូនអាជីវករពុំលក់តម្លើងថ្លៃដែលធ្វើឲ្យម៉ូយនាំគ្នាមកកុំម្ម៉ង់ទិញដោយពុំចាំបាច់តថ្លៃតឹងសសៃករ នោះ៕

អត្ថបទ៖នរា