តំណាងស្ថាប័ន Guinness World Records មកដល់ក្រុងសៀមរាប

នៅព្រឹកថ្ងៃទី១១ ខែមេសា ឆ្នាំ២០២៣នេះ សហភាពសហព័ន្ធយុវជនកម្ពុជា បានប្រកាសពីការអញ្ជើញមកដល់ របស់តំណាងស្ថាប័ន Guinness World Records នៅក្រុងសៀមរាប ដើម្បីត្រៀមក្នុងការត្រួតពិនិត្យ និងរាប់ចំនួនបេះដូងក្រដាស នៅទីតាំង ប្រាសាទអង្គរវត្ត ។

បើតាមសហភាពសហព័ន្ធយុវជនកម្ពុជា នៅសល់ត្រឹមតែប៉ុន្មានម៉ោងទៀតប៉ុណ្ណោះ ការបំបែកឯតទគ្គកម្ម “បេះដូងច្រើនជាងគេលើពិភពលោក” ដែលកំពុងដាក់តាំងបង្ហាញនៅប្រាសាទអង្គរវត្ត នឹងចាប់ផ្តើមជាផ្លូវការ នៅវេលាម៉ោង ៤រសៀលតទៅ ក្នុងបរិវេណប្រាសាទអង្គរវត្ត នាថ្ងៃទី១១ ខែមេសា ឆ្នាំ២០២៣ នេះ។​

គួរបញ្ជាក់ថា ការបំបែកឯតទគ្គកម្ម “បេះដូងច្រើនជាងគេលើពិភពលោក” ដែលបត់ដោយដៃប្រជាពលរដ្ឋខ្មែរនេះ ធ្វើឡើងក្នុងអត្ថន័យ ជាការលើកទឹកចិត្តដល់អត្តពលិក ដែលចូលរួមក្នុងការប្រកួតស៊ីហ្គេម និងអាស៊ានប៉ារ៉ាហ្គេម ដែលនឹងខិតជិតចូលមកដល់នាពេលខាងមុខនេះ៕