ព័ត៌មានជាតិ

ពិព័រណ៍ម្ហូបអាហារ និងផលិតផលព្រឹត្តិការណ៍អង្គរសង្ក្រាន្ត រួមចំណែកលើកកម្ពស់ជីវភាពប្រជាជន

បានផុស

២ years មុន

នៅ

ថ្ងៃចន្ទ ១៧ មេសា ២០២៣

ដោយ

តាមរយៈទិដ្ឋភាពនៃពិព័រណ៍ម្ហូបអាហារ និងផលិតផលផ្សេងៗរបស់អាជីវករនៅក្នុងអង្គរសង្ក្រាន្តនាខេត្តសៀមរាប បានចូលរួមលើកកម្ពស់ជីវភាពប្រជាជន ព្រមទាំងបានបើកឱកាសដល់ការដាក់តាំងបង្ហាញនូវផលិតផលរបស់ពួកគេ ដល់ភ្ញៀវទេសចរឱ្យបានដឹង និងស្គាល់ពីផលិតផលដ៏៏សប្បូរបែប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងព្រឹត្តិការណ៍អង្គរសង្ក្រាន្តខេត្តសៀមរាបប៉ុន្មានថ្ងៃកន្លងមកនេះ បានបង្ហាញឱ្យឃើញពីការដាក់តាំងមុខម្ហូបជាច្រើនសម្បូរបែប តាមស្តង់ពិព័រណ៍នានាជាច្រើន ដែលជាផលិតផលរបស់អាជីវករក្នុងតំបន់ ក៏ដូចជាបណ្ដាអ្នកលក់ដូរជាច្រើន ទៅដល់ភ្ញៀវទេសចរជាតិ និងអន្តរជាតិ។

ជាក់ស្ដែង ទិដ្ឋភាព នៃពិព័រណ៍ម្ហូបអាហារ ដាក់លក់ជាច្រើនមុខរបស់អាជីវករនៅតាមបណ្ដោយដងស្ទឹងសៀមរាប បានផ្ដល់ឱ្យភ្ញៀវទេសចរជាតិ-អន្តរជាតិ ប្រជាពលរដ្ឋតាមបណ្ដាខេត្តក្រុងនានា ដែលទៅលេងកម្សាន្ត អាចទទួលបាននូវម្ហូបអាហារដែលមានឱជារសសព្វបែបសព្វមុខ ការជាវផលិតផលផ្សេងៗ នៅតាមស្តង់ពាណិជ្ជកម្ម អមដោយការកម្សាន្តអារម្មណ៍ នឹងការជិះ ទូកតាមបណ្ដោយដងស្ទឹងសៀមរាប ព្រមទាំងតន្ត្រីប្រជាប្រិយជាច្រើនកន្លែងផងដែរ។

រាល់សកម្មភាពទាំងអស់នេះ អាចរំលេចឲ្យឃើញថា ព្រឹត្តិការណ៍អង្គរសង្ក្រាន្ត បានចូលរួមចំណែកយ៉ាងខ្លាំងក្នុងការលើកកម្ពស់សេដ្ឋកិច្ចរបស់ប្រជាពលរដ្ឋក្នុងខេត្តសៀមរាប ពិសេសការផ្ដល់ឱកាសឲ្យពួកគេ បានដាក់តាំងបង្ហាញផលិតផលរបស់ខ្លួន។

បន្ថែមនេះក៏នៅមាន «ភូមិអាហារនៃស្រលាញ់» ដែលទទួលបានការគាំទ្រខ្លាំងពីភ្ញៀវទេសចរ ព្រោះបានលើកយកអាហារខ្មែរ និងវិធីសាស្ត្រធ្វើមកបង្ហាញ ដែលបង្កភាពងាយស្រួលដល់ប្រជាពលរដ្ឋទូទៅ អាចចូលរួមធ្វើទាំងអស់គ្នា។ ជាមួយគ្នានោះ បង្អែមពិសេសដែលបានដាក់លក់មាន ៣មុខ រួមមាន៖ នុំថ្លើមក្របី នុំផ្លែអាយ និងនុំអាកោ ត្នោតជាដើម។

ដោយឡែក ចំពោះស្តង់ពិព័រណ៍ពាណិជ្ជកម្ម ដែលមានទីតាំងនៅមុខប្រាសាទអង្គរវត្ត បានផ្ដល់ឱកាសឱ្យពាណិជ្ជករ សហគ្រិន និងអាជីវករចូលរួមតាំងបង្ហាញផលិតផលរបស់ខ្លួន ដើម្បីផ្សព្វផ្សាយ និងជំរុញផលិតផលដែលមានគុណភាព សុវត្ថិភាពឱ្យកាន់តែមានការទទួលស្គាល់យ៉ាងទូលំទូលាយ។

ផលិតផលដែលបានតាំងបង្ហាញរួមមាន សំលៀកបំពាក់, សម្ភារប្រើប្រាស់ប្រចាំថ្ងៃ, ផលិតផលអេឡិចត្រូនិក, ផលិតផលសិប្បកម្មចម្លាក់, ដេរ ប៉ាក់, សិប្បកម្មធ្វើពីផ្ដៅ, សិប្បកម្មសូត្រខ្មែរ, សិប្បកម្មដេរប៉ាក់, សិប្បកម្មគ្រឿងអលង្ការ, គ្រឿងឧបភោគបរិភោគ និងផលិតផលកែច្នៃរបស់ខ្មែរផ្សេងៗជាច្រើនទៀត សុទ្ធសឹងតែបានដាក់បង្ហាញក្នុងព្រឹត្តិការណ៍អង្គសង្ក្រាន្តនេះ។