អភិបាលរាជធានីជំរុញក្រុមការងាររៀបចំពិធីបុណ្យកាត់ឫសសីមាវត្តព្រះបារមីវង្កតបុរីឱ្យបានល្អ

រដ្ឋបាលរាជធានីភ្នំពេញនឹងរៀចំពិធីបុណ្យកាត់ឫសសីមាព្រះវិហារ និងសម្ពោធសមិទ្ធផលនានានៅក្នុងវត្តព្រះបារមីវង្កតបុរីមានរយៈពេល ៣ យប់ ៤ ថ្ងៃ ចាប់ផ្តើមពីថ្ងៃទី ២២ ដល់ថ្ងៃទី ២៤ ខែមេសា ឆ្នាំ ២០២៣។

សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែននឹងអញ្ជើញជាអធិបតីភាពក្នុងពិធីកាត់ឫសសីមា។

ដើម្បីឱ្យពិធីនេះប្រព្រឹត្តទៅដោយភាពអធិកអធម និងរក្សាបានសន្តិសុខសណ្តាប់ធ្នាប់ល្អប្រសើរ ១០០ ភាគរយជូនថ្នាក់ដឹកនាំប្រទេសនោះ លោក ឃួង ស្រេង អភិបាលនៃគណៈ អភិបាលរាជធានីភ្នំពេញ តែងបានដឹកនាំក្រុមការជំនាញចុះពិនិត្យទីតាំងជាក់ស្តែងក្នុងទីអារាមវត្តនេះ ដែលស្ថិតក្នុងសង្កាត់អូរបែកក្អម ខណ្ឌសែនសុខ នឹងបើកកិច្ចប្រជុំជាបន្តបន្ទាប់ជាមួយកងកម្លាំងពាក់ព័ន្ធ។

ជាក់ស្តែងនៅរសៀលថ្ងៃទី ១៧ ខែ មេសា ឆ្នាំ២០២៣នេះ លោក ឃួង ស្រេង បានបន្តដឹកនាំមន្ត្រីជំនាញជុំវិញរដ្ឋបាលរាជធានីភ្នំពេញចុះពិនិត្យទីតាំងប្រារព្ធពិធីនៅទីតាំងរៀបចំវេទិកាគណអធិបតី ព្រះវិហារ កន្លែងរៀបចំកម្មវិធីកម្សាន្តសប្បាយ និងតាមរោងទិស ព្រមទាំងបើកកិច្ចប្រជុំពិភាក្សាលើការងារមួយចំនួនថែមទៀត ដើម្បីធានាថា ពិធីនេះបានប្រព្រឹត្តទៅដោយភាពអធិកអធម និងមានសន្តិសុខ សណ្តាប់ធ្នាប់ល្អប្រសើរ ១០០ ភាគរយ ជូនថ្នាក់ដឹកនាំប្រទេស។

ថ្លែងនៅក្នុងកិច្ចប្រជុំដែលបានធ្វើឡើងក្នុងទីអារាមវត្តព្រះបារមីវង្កតបុរីនេះ លោក ឃួង ស្រេង បានជំរុញក្រុមការងារគ្រប់ផ្នែកអនុវត្តភារកិច្ចរៀងៗខ្លួនឱ្យបានល្អ លើការងាររៀបចំសន្តិសុខសណ្តាប់ធ្នាប់ពិសេសកិច្ចការពារសុវត្ថិភាពជូនសម្ដេចតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិតប៊ុនរ៉ានីហ៊ុន សែន។

នៅក្នុងពិធីបុណ្យ ៣ យប់៤ថ្ងៃនេះ គឺមានរៀបចំក្រុមសិល្បៈកម្សាន្តជាច្រើនក្រុម ដើម្បីសម្តែងជូនទស្សនិកជនបានមើលកម្សាន្តក្នុងនោះមានក្រុមល្ខោនបាសាក់, ចាប៉ីដងវែង, អាយ៉ៃឆ្លើយឆ្លង និងការប្រគុំតន្ត្រីផងដែរ។ ដូច្នេះទេ លោកជំរុញឱ្យមានការរៀបចំឱ្យបានល្អប្រសើរ។

សូមបញ្ជាក់ថា វត្តព្រះបារមីវង្កតបុរី ជាទីអារាមមួយដែលបានតម្កល់ធាតុមាតាបិតារបស់សម្ដេចតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុន សែន។

ក្រោមគំនិតផ្ដួចផ្ដើមរបស់សម្ដេចទាំងទ្វេ វត្តព្រះបារមីវង្កតបុរី នឹងត្រូវធ្វើពិធីបុណ្យកាត់ឫសសីមាព្រះវិហារដ៏ធំមួយ ដោយចាប់ផ្តើមពីថ្ងៃទី ២២ ដល់ថ្ងៃទី ២៤ មេសាឆ្នាំ២០២៣។

នៅថ្ងៃ ២៤ ខែមេសាសម្ដេចតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិតប៊ុន រ៉ានីហ៊ុន សែន នឹងអញ្ជើញកាត់ឫសីមា ដោយនឹងមានការចូលរួមពីពុទ្ធបរិស័ទ និងប្រជាពលរដ្ឋយ៉ាងច្រើនកុះករ៕

អត្ថបទ៖ ស្រីរ័ត្ន