ត្រៀមសម្ពោធ​​អគារសម្ភពមន្ទីរពេទ្យកុមារជាតិ បំពាក់គ្រឿង​បរិក្ខារទំនើបៗ

លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាលនៅព្រឹកថ្ងៃទី ១៨ ខែមេសាឆ្នាំ២០២៣ បានអញ្ជើញចុះពិនិត្យនិងរៀបចំអគារសម្ភពរបស់មន្ទីរពេទ្យកុមារជាតិ ដើម្បីត្រៀមសម្ពោធជាផ្លូវការនៅថ្ងៃទី ២០ ខែមេសា ឆ្នាំ២០២៣​ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ថ្លែងក្នុងឱកាសចុះពិនិត្យអគារសម្ភពមន្ទីរពេទ្យកុមារជាតិនាឱកាសនោះ លោករដ្ឋមន្ត្រីបានមានប្រសាសន៍ថា នេះជាលើកទី ៤ ដែលសម្តេចនាយករដ្ឋមន្ត្រីបានអញ្ជើញចូលរួមសម្ពោធដាក់ឱ្យប្រើប្រាស់អគារនៅមន្ទីរពេទ្យកុមារជាតិ។ អគារសម្ភពនេះមានកម្ពស់ ៤ ជាន់ដែលអាចដាក់អ្នកជំងឺបានប្រមាណ ១០០ គ្រែ។

លោករដ្ឋមន្ត្រីបានបន្តថា ការមានអគារមន្ទីរពេទ្យថ្មីបន្ថែមទៀតនឹងជួយលើកកម្ពស់សុខុមាលភាពមាតា និង​កុមារកាន់តែប្រសើរបន្ថែមទៀត ព្រោះអគារនេះមានបំពាក់នូវបរិក្ខាពេទ្យទំនើបនិងមានប្រើប្រាស់ប្រព័ន្ធឌីជីថលក្នុងការគ្រប់គ្រងទិន្នន័យ​​និងប្រវត្តិអ្នកជំងឺបានច្បាស់លាស់ងាយស្រួល ក្នុងការផ្ដល់សេវាព្យាបាលអ្នកជំងឺបានលឿនរហ័សប្រកបដោយគុណភាពនិងប្រសិទ្ធិភាពខ្ពស់។

លោកសាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិបានឱ្យដឹងថា អគារសម្ភពថ្មីនេះមានទទឹង ១៥ ម៉ែត្រនិងបណ្តោយ ៦០ ម៉ែត្រមានកម្ពស់៤ជាន់ ចាប់ផ្ដើមសាងសង់នៅខែកម្ភៈឆ្នាំ២០២១ ហើយបញ្ចប់ការសាងសង់និងបើកឱ្យដំណើរការនៅខែកញ្ញាឆ្នាំ២០២២ ដោយចំណាយថវិការបស់រាជរដ្ឋភិបាល។

លោកសាស្ត្រាចារ្យបានបន្តថា អគារថ្មីនេះមានបំពាក់សម្ភារបរិក្ខាពេទ្យទំនើបជាជំនួយរបស់ប្រទេសឆេក ដោយមានផ្តល់សេវាពិគ្រោះជំងឺកុមារ ពិនិត្យផ្ទៃពោះ ចាក់ថ្នាំបង្ការកុមារ រោគស្ត្រី សម្រាលកូន  ផ្នែកវះកាត់និងទារកមានបញ្ហាផ្សេៗក្រោយសម្រាល។

នេះជាលើកទី ៤ ដែលសម្តេចតេជោនាយករដ្ឋមន្ត្រីបានអញ្ជើញសម្ពោធអគារផ្សេងៗនៅក្នុងមន្ទីរពេទ្យកុមារជាតិដោយលើកទី ១ នៅខែកម្ភៈឆ្នាំ២០០០  សម្ពោធឲ្យប្រើបា្រស់អគាររាងជាអក្សរអិល (L) ដែលជួសជុលកែលម្អឡើងវិញ លើកទី២នៅខែមករា ឆ្នាំ ២០០៧ សម្ពោធ​អគារមិត្តភាពកម្ពុជា-កូរ៉េ មួយខ្នង ៣ ជាន់ លើកទី ៣ នៅខែឧសភា ឆ្នាំ​២០១៨ សម្ពោធ អគារមិត្ដភាព កម្ពុជា-កូរ៉េ ដែលបានកែលម្អសារជាថ្មី និងលើកទី៤ អគារសម្ភពដែលនឹងសម្ពោធនៅថ្ងៃទី២០មេសាឆ្នាំ២០២៣៕

អត្ថបទ៖ សំអឿន