លោក គឹម សន្តិភាព៖គណបក្សប្រជាជនកម្ពុជា គឺជាបក្សតែមួយគត់ដែលបម្រើប្រជាជន

គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន គឺជាគណបក្សតែមួយគត់ដែលកើតពីប្រជាជន នៅជាមួយប្រជាជន និងបម្រើផលប្រយោជន៍ប្រជាជនដោយគ្មានលក្ខខណ្ឌ។ នេះ គឺជាការលើកឡើងរបស់លោក គឹម សន្តិភាព រដ្ឋលេខាធិការក្រសួងយុត្តិធម៌ និងជាអនុប្រធានក្រុមការងារគណបក្សចុះមូលដ្ឋានស្រុកពញាក្រែក ខេត្តត្បូងឃ្មុំ នៅព្រឹកថ្ងៃទី១៩ ខែមេសានេះ។

ក្នុងពិធីជួបសំណេះសំណាលជាមួយប្រជាពលរដ្ឋខ្មែរឥស្លាមក្នុងស្រុកពញាក្រែក លោក គឹម សន្តិភាព បានលើកឡើងពីគុណបំណាច់ដ៏ធំធេងរបស់គណបក្សប្រជាជនកម្ពុជា ដែលបានរំដោះប្រទេស និងប្រជាពលរដ្ឋកម្ពុជាគ្រប់រូបឲ្យរួចផុតពីជ្រោះមរណនៃរបបប្រល័យពូជសាសន៍ ប៉ុល ពត ដ៏សាហាវឃោរឃៅព្រៃផ្សៃបំផុត។ លោកបានលើកឡើងថា ក្រោយថ្ងៃរំដោះ ៧មករា ឆ្នាំ១៩៧៩ កម្ពុជាចាប់ផ្ដើមអភិវឌ្ឍន៍ជាតិពីបាតដៃទទេរហូតមកដល់បច្ចុប្បន្នកម្ពុជា មានការរីកចម្រើនលូតលាស់លើគ្រប់វិស័យ មានស្ថិរភាព និងសន្តិភាពពេញបរិបូណ៌ទូទាំងប្រទេស។

លោក បានបន្ថែមថា សម្តេចតេជោនាយករដ្ឋមន្ត្រី ដែលជាប្រមុខដឹកនាំគណបក្សប្រជាជនកម្ពុជា បានយកចិត្តទុកដាក់បំផុតលើសិទ្ធិសេរីភាពគ្រប់បែបយ៉ាង រួមទាំងសេរីភាពនៃជំនឿសាសនាផងដែរ។ មិនតែប៉ុណ្ណោះ សម្តេចតេជោក៏តែងតែចូលរួមគ្រប់កម្មវិធីសាសនាក្នុងគោលបំណងធ្វើយ៉ាងណាឲ្យពលរដ្ឋ ខ្មែរទាំងអស់រស់នៅដោយសុខដុមរមនាដោយគ្មានការរើសអើងជំនឿសាសនា ឬការបំបិទសិទ្ធិសេរីភាពឡើយ។

លោក គឹម សន្តិភាព បានគូសបញ្ជាក់ថា សក្ខីភាពគ្រប់បែបយ៉ាងនេះហើយ គឺបានបញ្ជាក់ឲ្យឃើញយ៉ាងច្បាស់នូវគ្រប់ គោលនយោបាយ និងសកម្មភាពរបស់គណបក្សប្រជាជន ក៏ដូចជារាជរដ្ឋាភិបាល ដែលធ្វើឡើងដើម្បីតែផលប្រយោជន៍ប្រជាជន ដើម្បីថែរក្សាការពារស្ថិរភាព បូរណភាព ឯករាជ្យ សន្តិភាព និងការអភិវឌ្ឍជាតិជានិរន្តរ៍។

បើតាមមន្ត្រីរូបនេះ គណបក្សប្រជាជនកម្ពុជា នៅតែបន្តរក្សាគោលជំហរបម្រើប្រយោជន៍ជាតិ និងប្រជាជនថែមទៀត។ ដូច្នេះដើម្បីឲ្យគណបក្សប្រជាជនកម្ពុជាបន្តដឹកនាំនាវាកម្ពុជាបន្តទៀត លោក គឹម សន្តិភាព អំពាវនាវដល់ពលរដ្ឋទាំងអស់បន្តគាំទ្រ និងបោះឆ្នោតជូនគណបក្សប្រជាជនកម្ពុជា នៅថ្ងៃទី២៣ ខែកក្កដា ឆ្នាំ២០២៣ ខាងមុខកុំបីខាន ដើម្បីរក្សាភាពឈ្នះលើសលប់ភ្លូកទឹកភ្លូកដីបន្តទៀត៕