ព័ត៌មានជាតិ

អភិបាលខេត្តកណ្តាល ជំរុញឲ្យពន្លឿនការចុះបញ្ជីដីធ្លីឱ្យបានចប់តាមផែនការ

បានផុស

២ years មុន

នៅ

ថ្ងៃពុធ ១៩ មេសា ២០២៣

ដោយ

នាថ្ងៃទី១៩ ខែមេសា ឆ្នាំ២០២៣នេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាលបានជំរុញឱ្យអភិបាលក្រុង-ស្រុក និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បន្តសហការគ្នានិងជំរុញការងារចុះបញ្ជីដីធ្លីជាប្រព័ន្ធនៅតាមបណ្ដាក្រុង-ស្រុក ទូទាំងខេត្តឱ្យបានចប់តាមផែនការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពិធីជួបសំណេះសំណាលជាមួយមន្ត្រី មន្ត្រីជាប់កិច្ចសន្យា អ្នកស្ម័គ្រចិត្ត លើការងារចុះបញ្ជីដីធ្លីមានលក្ខណៈជាប្រព័ន្ធ ទូទាំងខេត្តកណ្ដាលនាព្រឹកមិញ លោក គង់ សោភ័ណ្ឌ បានលើកឡើងថា ការចុះបញ្ជីដីធ្លីមានអត្ថប្រយោជន៍ដល់ប្រជាពលរដ្ឋ ព្រោះអាចធានាបានកម្មសិទ្ធិករស្រប់ច្បាប់លើដី ដោយការផ្ដល់នូវវិញ្ញាបនបត្រសម្គាល់ម្ចាស់អចលនវត្ថុ ព្រមទាំងចូលរួមកាត់បន្ថយ និងលុបបំបាត់នូវវិវាទដីធ្លី ជាក់ស្ដែងជម្លោះព្រំប្រទល់ត្រូវបានកាត់បន្ថយស្ទើរទាំងស្រុង។

មិនតែប៉ុណ្ណោះ វាជាវត្ថុតាងស្របច្បាប់ផ្ដល់នូវទំនុកចិត្តដល់ម្ចាស់ដីនិងអ្នកដែលត្រូវបន្តវេន ក៏ដូចជាបង្កើតទីផ្សារដីប្រកបដោយទំនុកចិត្ត ការវិនិយោគនឹងកើនឡើង ដែលជាកម្លាំងចលករជំរុញដល់កំណើនសេដ្ឋកិច្ច កាត់បន្ថយភាពក្រីក្ររបស់ប្រជាពលរដ្ឋ។

បន្ថែមពីនេះលោកអភិបាលខេត្តបានណែនាំដល់អភិបាលក្រុង-ស្រុក មន្ទីរអង្គភាពពាក់ព័ន្ធ ពិសេសមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ត្រូវបន្តអនុវត្តផែនការចុះបញ្ជីដីរួមទាំងការចុះបញ្ជីដីរដ្ឋ ដីសាធារណៈរបស់រដ្ឋ ដីសម្បទានសេដ្ឋកិច្ច ដើម្បីធានានូវសុវត្ថិភាពនៃការកាន់កាប់ដីធ្លី ដែលជាទុនផ្ដល់ដោយរាជរដ្ឋាភិបាលជូនប្រជាពលរដ្ឋ សម្រាប់រស់នៅ ដាំដុះ និងវិនិយោគដើម្បីបង្កើតមុខរបរនិងបង្កើនប្រាក់ចំណូល។

លើសពីនេះទៀត ត្រូវបន្តអនុវត្តឱ្យបានតាមទិសស្លោក «ធ្វើឱ្យបាន ធ្វើឱ្យលឿន និងមានតម្លាភាព» ដើម្បីធានាថាប្រជាពលរដ្ឋទទួលបានសេវាកាន់តែងាយស្រួល, កាន់តែឆាប់រហ័ស, មានតម្លាភាព និងមានគណនេយ្យភាព។

លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្ដាលបានឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធនៅក្នុងខេត្តបានបញ្ចប់ពីរក្រុងស្រុក មាននៅស្រុកកណ្ដាលស្ទឹង និងក្រុងតាខ្មៅ ហើយបានកំពុងបន្តអនុវត្តនៅស្រុកល្វាឯម ស្រុកស្អាង ស្រុកអង្គស្នួល ស្រុកខ្សាច់កណ្ដាល ស្រុកកោះធំ ស្រុកពញាឮ ស្រុកកៀនស្វាយ ស្រុកមុខកំពូល និងស្រុកលើកដែកបន្តទៀត៕

Related Topics:លោក គង់ សោភ័ណ្ឌ