សម្ដេចតេជោ ៖ ប្រជាជននៅលើពិភពលោក នឹងទទួលបានប្រយោជន៍ច្រើន បើប្រទេសនានាផ្ទេរប្រាក់ផលិតអាវុធ ៥០ភាគរយ ទៅផលិតថ្នាំពេទ្យវិញ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ប្រជាជននៅលើពិភពលោក នឹងទទួលបានផលប្រយោជន៍ច្រើន ប្រិសនបើបណ្ដាប្រទេសនានាផ្ទេរប្រាក់ប្រមាណជា ៥០ភាគរយដែលត្រូវផលិតអាវុធ មកផលិត ចែកចាយថ្នាំពេទ្យ ដែលមានតម្លៃថោកសមរម្យវិញនោះ។

សម្ដេចតេជោ ហ៊ុន សែន បានថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ រាជធានីភ្នំពេញ នៅព្រឹកថ្ងៃទី ២០ ខែមេសានេះថា ប្រសិនបើបណ្ដាប្រទេសនានានៅលើពិភពលោក យកប្រាក់ដែលសម្រាប់ផលិតអាវុធ ផ្ទេរទៅជាផលិតថ្នាំពេទ្យវិញ នឹងធ្វើឲ្យតម្លៃថ្នាំពេទ្យ មានការធ្លាក់ចុះ។ ប៉ុន្តែមិនដូច្នេះឡើយ ពោលគឺបណ្ដាប្រទេសនានា បាននិងកំពុងប្រណាំងប្រជែងគ្នា បង្កើនចំនួនកងទ័ព និងបង្កើនចំនួនសព្វាវុធ ទៅវិញ។

សម្ដេចតេជោ ហ៊ុន សែន ថ្លែងបែបនេះថា «នៅលើពិភពលោក បើសិនជាយកអាលុយទាំងឡាយ ដែលសម្រាប់ប្រើប្រាស់លើអាវុធ ផ្ទេរមកទៅជាផលិតថ្នាំពេទ្យ លក់ចែកចាយការពារសុខភាពប្រជាពលរដ្ឋ ខ្ញុំមិនដឹងថា នៅលើពិភពលោកតម្លៃឱសថនឹងធ្លាក់ចុះ ប៉ុនឥឡូវនាំគ្នា ប្រទេសមួយៗ គឺថា គិតតែរត់ប្រណាំងគ្នារឿង បង្កើនកម្លាំងទាហាន បង្កើនសព្វាវុធ សម្រាប់កំទេចគ្នាទៅវិញទៅមក ចាយលុយអស់ច្រើនណាស់»។

សម្ដេចតេជោ ហ៊ុន សែន លើកឡើងទៀតថា ប្រសិនបើផ្ទេរបា្រក់ពីការផលិតអាវុធប្រមាណជា ៥០ភាគរយ មកផលិតជាថ្នាំពេទ្យវិញ ហើយលក់ចែកចាយនូវតម្លៃចុះប្រមាណជា ៥០ភាគវិញនោះ គឺប្រជាជននៅទូទាំងពិភពលោក នឹងទទួលបានផលប្រយោជន៍ច្រើន។ ប៉ុន្តែបណ្ដាប្រទេសនានា មិនបានគិតដូច្នេះឡើយ ដោយពួកគេគិតតែពីរឿងប្រណាំងប្រជែងគ្នារឿងសព្វាវុធ និងធ្វើសង្រ្គាមដាក់គ្នា។ សម្ដេចតេជោ ហ៊ុន សែន បានបន្ថែមថា សម្រាប់អ្នកចំណេញពិតប្រាកដក្នុងបញ្ហាសង្គ្រាមនោះ គឺជាអ្នកផលិតអាវុធ ហើយអាវុធនេះបានបំផ្លាញជីវិតមនុស្សយ៉ាងច្រើន នៅលើពិភពលោក៕