បទល្មើសនេសាទនៅក្នុងតំបន់អភិរក្សទួលចារ កើតមានឡើងមន្ត្រីជលផលមិនចំណាត់ការ

ប្រជានេសាទភូមិស្ទឹងស្ងួត ឃុំអំពិលទឹក ស្រុកកំពង់ត្រឡាតបានរាយការណ៍ និងបានបាញ់រូបភាពកាលពីថ្ងៃទី ១៨ ខែមេសា ឱ្យដឹងថា បទល្មើសនេសាទដាក់សម្រាស់ និងរបាំងចាប់ត្រីខុសច្បាប់កើតមានយ៉ាងអនាធិបតេយ្យនៅក្នុងតំប ន់អភិរក្សទួលចារ ក្នុងភូមិស្ទឹងស្ងួត ដែលលោក ជួន ផង់ ប្រធានសហគមន៍នេសាទ មិនខ្វាយខ្វល់ឡើយ ហើយមន្ត្រីជលផលទទួលខុសត្រូវក្នុងដែនសមត្ថកិច្ចសង្កាត់នេសាទកំពង់ត្រឡាច ក៏មិនអើពើនោះដែរករណីនេះអ្នកណាទទួលខុសត្រូវ។

ករណីនេះប្រជានេសាទសំណូមពរលោក ងិនហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្ត លោក លី ឡា នាយខណ្ឌរដ្ឋបាលជលផលកំពង់ឆ្នាំង និងលោក វន ស៊ីផា អភិបាលស្រុក និងជាប្រធានគណៈបញ្ជាការឯកភាពស្រុកកំពង់ត្រឡាច មេត្តាជួយចំណាត់ការបង្ក្រាបផង។

ប្រជានេសាទក៏សំណូមពរផងដែរដល់លោកប្រធានមន្ទីរកសិកម្មខេត្តគួរតែបោះឆ្នោតជ្រើសរើសប្រធានសហគមន៍នេសាទ​ស្ទឹងស្ងួតថ្មីព្រោះប្រធានសហគមន៍ចាស់លោក ជួន ផង់ គ្មានសមត្ថភាពការពារតំបន់អភិរក្សខាងលើនេះឡើយ គឺឃើញបទល្មើសនេសាទកើតមានទាំងវស្សា។

ជុំវិញករណីខាងលើនេះ លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងនៅព្រឹកថ្ងៃទី២០ ខែមេសាឆ្នាំ២០២៣ នេះបានឆ្លើយប្រាប់តាមទូរសព្ទថា បទល្មើសនៅចំណុចខាងលើនេះលោកបានបញ្ជារឱ្យសង្កាត់នេសាទកំពង់ត្រឡាច និងផ្នែកនេសាទកំពង់ប្រាសាទចុះបង្ក្រាបហើយកាលពីថ្ងៃទី ១៨ និង ១៩ ប៉ុន្តែមកដល់ពេលនេះលោកពុំទាន់ទទួលបានរបាយការណ៍នៅឡើយ។

គួរបញ្ជាក់ផងដែរថា សម្ដេចតេជោ ហ៊ុន សែន នាយករដ្ឋមន្ត្រីធ្លាប់បាបញ្ជាឱ្យអភិបាលខេត្តស្រុកចុះបង្ក្រាបបទល្មើសនេ សាទជាប្រចាំ ដោយមិនត្រូវបណ្ដែតបណ្ដោយឲ្យបទល្មើសកើតមានយ៉ាងអនាធិបតេយ្យនោះឡើយ។

តែបើបទល្មើសកើតមាននៅតំបន់ណា សមត្ថកិច្ច ឬអាជ្ញាធរនៅតំបន់នោះត្រូវតែទទួលខុសត្រូវចំពោះមុខច្បាប់ ហើយក៏អាចប្រឈមនឹងការដកចេញពីតំណែងផងដែរ៕

អត្ថបទ៖ ឈៀង ថារិទ្ធ