ព័ត៌មានជាតិ

ខេត្តត្បូងឃ្មុំដាក់ផែនការប្រកួតប្រជែងគ្មានសំរាមតាមផ្លូវជាតិ

បានផុស

២ years មុន

នៅ

ថ្ងៃព្រហស្បតិ៍ ២០ មេសា ២០២៣

ដោយ

ខេត្តត្បូងឃ្មុំបានដាក់ផែនការលើកកម្ពស់ការងារបរិស្ថាន ដោយលើកទឹកចិត្តឲ្យឃុំសង្កាត់មានភូមិសាស្រ្តជាប់តាមបណ្តោយផ្លូវជាតិឆ្លងកាត់ប្រកួតប្រជែងគ្នាសម្អាតបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំបានឲ្យដឹងថា ជុំវិញការងារបរិស្ថាន រដ្ឋបាលខេត្តបានធ្វើការងារយ៉ាងច្រើន។ រដ្ឋបាលខេត្តបានលើកវិធានការ ធ្វើម៉េចឲ្យតាមដងផ្លូវជាតិឆ្លងកាត់ខេត្ត មានបរិស្ថានស្អាតគ្មានសម្រាម ដោយលើកទឹកចិត្តដល់បណ្តាឃុំសង្កាត់ដែលមានផ្លូវជាតិឆ្លងកាត់ប្រកួតប្រជែងគ្នា។

លោកបន្តថា ឃុំសង្កាត់ដែលពាក់ព័ន្ធត្រូវរៀបចំក្រុមការងារ បើឃុំសង្កាត់ណាគ្រប់គ្រងសម្រាមសំណល់រឹងសំណល់រាវបានល្អបានលេខ ១ ទទួលបានរង្វាន់ ៥ លានរៀល លេខ ២ ទទួលបាន ៤ លានរៀល និងលេខ ៣ ទទួលបាន ៣ លានរៀល។

លោកបន្តថា ការដាក់វិធានការនេះដើម្បីចូលរួមថែរក្សាអនាម័យតាមដងផ្លូវ មានបរិស្ថានស្អាតគ្មានសម្រាមជាមុខមាត់របស់ខេត្តផងដែរ។

នៅខេត្តត្បូងឃ្មុំមានផ្លូវជាតិឆ្លងកាត់ជាច្រើនខ្សែដូចជា ផ្លូវជាតិលេខ ៧ ផ្លូវជាតិលេខ ៨ ផ្លូវជាតិលេខ ១១ ផ្លូវជាតិលេខ ៧៣ ផ្លូវជាតិលេខ ៧២ និងផ្លូវជាតិលេខ ៧១ សេ។

បើតាមលោក ជាម ច័ន្ទសោភ័ណ ផ្លូវជាតិលេខ ៧១ សេ កំពុងស្ថាបនាសម្រេចបានជាង ៧០ ភាគរយ ដែលគ្រោងនឹងបញ្ចប់នៅដើមឆ្នាំ ២០២៤។ ដោយឡែកមន្ទីរអភិវឌ្ឍជនបទ ដាក់ផែនការបន្តស្ថាបនាផ្លូវកៅស៊ូប្រវែង ២០៥ គីឡូម៉ែត្រ និងផ្លូវបេតុងប្រវែង ៣២ គីឡូម៉ែត្រ ខណៈផ្លូវដែលស្ថិតនៅក្រោមមន្ទីរសាធារណខេត្តមានប្រវែងជាង ២២៩ គីឡូម៉ែត្រ៕