ព័ត៌មានជាតិ

ពលករខ្មែរជាង៥ពាន់នាក់ ត្រូវអាជ្ញាធរខេត្តបន្ទាយមានជ័យ បញ្ជូនឲ្យវិលត្រឡប់ទៅស្រុកកំណើតវិញ

បានផុស

៣ years មុន

នៅ

ថ្ងៃអង្គារ ១៩ មករា ២០២១

ដោយ

គិតត្រឹមល្ងាចថ្ងៃទី១៨ ខែមករា ឆ្នាំ២០២១ អាជ្ញាធរខេត្តបន្ទាយមានជ័យបានបញ្ជូនពលករខ្មែរមកពីថៃជាង៥ពាន់នាក់ ឲ្យវិលត្រឡប់ទៅស្រុកកំណើតរៀងៗខ្លួនវិញ បន្ទាប់ពីពួកគេបានធ្វើចត្តាឡីស័កគ្រប់ចំនួន១៤ថ្ងៃ និងធ្វើតេស្តអវិជ្ជមានកូវីដ១៩រួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លី សារី អភិបាលរងនិងជាអ្នកនាំពាក្យសាលាខេត្តបន្ទាយមានជ័យ បានមានប្រសាសន៍ថា ពលករដែលត្រូវបញ្ជូនត្រឡប់ទៅស្រុកកំណើតវិញ បន្ទាប់ពីពួកគេបានធ្វើចត្តាឡីស័កគ្រប់ចំនួន១៤ថ្ងៃ និងបានធ្វើតេស្តលើកទី១និងទី២ ដោយលទ្ធផលតេស្តអវិជ្ជមានវីរុសកូវីដ១៩រួចមក។ លោកបានបន្តថា គិតត្រឹមល្ងាចថ្ងៃទី១៨ ខែមករា ឆ្នាំ២០២១ រដ្ឋបានខេត្តបានចេញលិខិតបញ្ជាក់សុខភាពថា មិនមានជំងឺកូវីដ១៩ដល់ពលករខ្មែរមកពីថៃចំនួន៥៣៦៧នាក់ក្នុងនោះស្រី២២៩២នាក់ ឲ្យវិលត្រឡប់ទៅស្រុកកំណើតវិញ។ លោកបានបន្តទៀតថា ការចេញលិខិតបញ្ជាក់សុខភាពនេះ គឺដើម្បីឲ្យអាជ្ញាធរខេត្ត ដែលទទួលពលករបន្តងាយស្រួល ក្នុងការចាត់ចែងនិងគ្រប់គ្រងឲ្យបានល្អ សំដៅចូលរួមទប់ស្កាត់ការឆ្លងរីករាលដាលចូលទៅក្នុងសហគមន៍។

ឯកឧត្ដមបានបន្ថែមទៀតថា រហូតមកដល់ល្ងាចថ្ងៃទី១៨ ខែមករា ឆ្នាំ២០២១នេះ មានពលករកំពុងធ្វើចត្តាឡីស័ក នៅតាមមណ្ឌលចត្តាឡីស័កទាំង១៧កន្លែង សរុបចំនួន៣៩៨៥នាក់ ក្នុងនោះស្រី១៧៧០នាក់។

យោងតាមក្រសួងសុខាភិបាលបានឲ្យដឹងថា គិតត្រឹមម៉ោង៧ព្រឹកថ្ងៃទី១៩ ខែមករា ឆ្នាំ២០២១នេះក្នុងចំណោមអ្នកឆ្លងជំងឺកូវីដ១៩ សរុបចំនួន៤៤១នាក់ ក្នុងនោះមានពលករខ្មែរមកពីថៃចំនួន៧០នាក់ និងមានអ្នកជាសះស្បើយចំនួន ៣៦៤នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន៥៥នាក់ ក្នុងនោះនៅមន្ទីរពេទ្យ ខេត្តបន្ទាយមានជ័យមាន៣៤នាក់ មន្ទីរពេទ្យខេត្តប៉ៃលិន១នាក់ ខេត្តឧត្តរមានជ័យ២នាក់ ខេត្តបាត់ដំបងចំនួន១១នាក់ និងនៅមជ្ឈមណ្ឌលជាតិកម្ចាត់រោគរបេងនិងហង់សិនចំនួន៧នាក់៕

អត្ថបទ៖ សំអឿន

សូមចុចអាន៖ ក្រសួងសុខាភិបាលប្រកាសរកឃើញករណីឆ្លងកូវីដ១៩ចំនួន ២នាក់