សម្ដេចតេជោ ហ៊ុន សែន ៖ ប្រសិនពុំមានរដ្ឋប្រហារ ១៨ មីនា ១៩៧០ ទម្លាក់សម្តេចឪទេ ប្រទេសយើងច្បាស់ជាអភិវឌ្ឍន៍ខ្ពស់ណាស់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ប្រសិនបើមិនមានរដ្ឋប្រហារទម្លាក់ ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ នាថ្ងៃទី ១៨ ខែមីនា ឆ្នាំ ១៩៧០ទេ ប្រទេសកម្ពុជា ច្បាស់ជាមានការអភិវឌ្ឍខ្លាំងណាស់។  

តាមរយៈបណ្ដាញសង្គមតេលេក្រាម នៅយប់ថ្ងៃទី ២២ ខែមេសា ឆ្នាំ ២០២៣នេះ សម្ដេចតេជោ ហ៊ុន សែន បានបង្ហោះវីដេអូអំពីការធ្វើជាម្ចាស់ផ្ទះព្រឹត្តិការណ៍ប្រកួតកីឡា GANEFO របស់កម្ពុជា កាលពីឆ្នាំ ១៩៦៦ ដោយបានសរសេររៀរាប់ថា មើលវីដេអូមួយនេះធ្វើឲ្យយើងអាចកំណត់បានថា ប្រសិនពុំមានរដ្ឋប្រហារ ១៨ មីនា ១៩៧០ ទម្លាក់សម្តេចឪទេ ប្រទេសយើងច្បាស់ជាអភិវឌ្ឍន៍ខ្ពស់ណាស់។

សម្ដេចតេជោ ហ៊ុន សែន បានសរសេរបន្តថា កាលពី ៥៧ឆ្នាំមុន មានរូបភាពដូចក្នុងវីដេអូនេះ បើមិនមានសង្គ្រាមទេភាពរុងរឿង នឹងមានច្រើនលើសនោះច្រើនណាស់។

សម្ដេចតេជោ ហ៊ុន សែន លើកឡើងថា «សល់តែប៉ុន្មានថ្ងៃទៀតប៉ុណ្ណោះកូនចៅ នៃព្រះរាជាណាចក្រកម្ពុជាទី ២ នឹងបង្កើតព្រឹត្តិការណ៍ប្រហាក់ប្រហែលជាមួយព្រឹត្តិការណ៍ នៃព្រះរាជាណាចក្រទីមួយនាឆ្នាំ ១៩៦៦»។ សម្ដេចតេជោ ហ៊ុន សែន សូមឧទ្ទិសសមិទ្ធផលដែលកូនចៅ បាននិងកំពុងធ្វើនេះថ្វាយចំពោះព្រះវិញ្ញាណក្ខន្ធព្រះបិតាជាតិជាទីគោរពសង្ការៈ ប្រកបដោយការនឹករលឹក និងដឹងគុណពីកូនចៅ៕