គ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះព្យា​បាល​ជំងឺទូទៅជូនពលរដ្ឋក្នុងខេត្តស្ទឹងត្រែង

នៅថ្ងៃទី២៣ ខែមេសានេះ ក្រុមការងារគ្រូពេទ្យស្ម័គ្រចិត្តឯកឧត្តមហ៊ុនម៉ានី ៥៧៦នាក់ ដឹកនាំដោយលោក លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តបានបើកយុទ្ធនាការព្យាបាលជំងឺទូទៅ ជូនប្រជាពលរដ្ឋនៅតំបន់ដាច់ស្រយាលនៅក្នុងភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង។

លោក លេង ផាលី មានប្រសាសន៍ថា ប្រតិបត្តិការនេះបានធ្វើឡើងក្នុងបេសកកម្មដើម្បីប្រយោជន៍ជួយសម្រួលទុក្ខលំបាកដល់បងប្អូនប្រជាពលរដ្ឋ ជាពិសេសការព្យាបាលជំងឺទូទៅដើម្បីបានលើកកម្ពស់សុខភាពរស់នៅឲ្យបានល្អប្រសើរ។

លោកមានប្រសាសន៍បន្តថា សម្តេចតេជោប្រមុខរាជរដ្ឋាភិបាលបានយកចិត្តទុកដាក់ខ្ពស់ គិតគូរពីសុខទុក្ខបងប្អូនប្រជាពលរដ្ឋជាក់ស្ដែងដូចនៅពេលនេះបានផ្តល់ឱកាសឱ្យក្រុមការងារគ្រូពេទ្យស្ម័គ្រចិត្ត ឯកឧត្តមហ៊ុនម៉ានី បាននាំគ្រូពេទ្យមកពិនិត្យ និងជួយព្យាបាលជំងឺទូទៅបានចំនួន៥.២៣៦ នាក់ ក្នុងនោះមានស្រី្តចំនួន៣.៥៥៦នាក់ហើយសកម្មភាពព្យាបាលនេះបានបង្ហាញពីការយកចិត្តទុកដាក់ក្នុងការដោះស្រាយបញ្ហាផ្នែកសុខភាពនៅទីជនបទ ក្នុងពេលដែលប្រជាពលរដ្ឋយើងត្រូវការចាំបាច់។

លោក ស្វាយ សំអ៊ាង អភិបាលខេត្តស្ទឹងត្រែង មានប្រសាសន៍ថា នេះពិតជាអនុវត្តបានឆ្លើយតបតាមគោលនយោបាយរបស់រាជរដ្ឋាភិបាល ធ្វើឲ្យប្រទេសកម្ពុជាយើងមានកេរ្តិ៍ឈ្មោះល្បី គឺទទួលបានចំណាត់ថ្នាក់លេខ១ទាំង ការចាក់វ៉ាក់សាំងជាសាកល និងការព្យាបាលជំងឺជូនបងប្អូនប្រជាពលរដ្ឋក៏អនុវត្តបានយ៉ាងខ្ជាប់ខ្ជួនទាំងនៅទីក្រុង និងទីជនបទ មកដល់បច្ចុប្បន្ននេះ។

លោកស្រី ស៊ុត ឃឿន អាយុ៧៣ឆ្នាំរស់នៅភូមិស្រែគរ១ បានគាំទ្រដល់សកម្មភាពមកព្យាបាលជំងឺទូទៅដល់ប្រជាពលរដ្ឋនៅពេលនេះ ព្រោះបានកាត់បន្ថយការចំណាយផង ហើយប្រជាពលរដ្ឋមានសុខភាពល្អ ក្នុងការរស់ប្រកបដោយសុខដុមរមនា និងធ្វើឲ្យសង្គមជាតិយើងឈានឆ្ពោះទៅរកសុខសន្តិភាព វិបុលភាពគ្រប់យ៉ាង។

សូមបញ្ជាក់ថា នេះជាលើកទី១នៅក្នុងឆ្នាំ២០២៣ដែលក្រុមការងារគ្រូពេទ្យស្ម័គ្រចិត្ត ឯកឧត្តមហ៊ុនម៉ានីបានមកដល់ខេត្តស្ទឹងត្រែងជាថ្មីម្តងទៀត បន្ទាប់ពីនៅថ្ងៃទី៦ ខែតុលាឆ្នាំ២០២២បានមកធ្វើបេសកកម្មបែបនេះម្តងរួចមកហើយនៅក្នុងក្រុងស្ទឹងត្រែង ហើយចប់បេសកកម្មនេះក្រុមការងារគ្រូពេទ្យស្ម័គ្រចិត្ត និងបន្តទៅខេត្តកំពុងស្ពឺទៀត៕

អត្ថបទ៖ ងិនលីម