នាវាស្វ័យការពារជើងទឹកជប៉ុន ២ គ្រឿង ចូលចត ២ ថ្ងៃ នៅកំពង់ផែស្វយ័តក្រុងព្រះសីហនុ

នាវា​កង​ស្វ័យ​ការពារ​ជើង​ទឹក​ជប៉ុន​ចំនួន ០២ គ្រឿង បាន​ចូល​ចត​ដោយ​សុវត្ថិភាព នៅ​ម៉ោង​ប្រមាណ ១០ ព្រឹក ថ្ងៃ​ទី ២៤ ខែ​មេសា ឆ្នាំ ២០២៣ នា​កំពង់ផែ​ស្វយ័ត​ក្រុងព្រះសីហនុ។

ក្នុង​ឱកាស​ទទួល​បដិសណ្ឋាកិច្ច នៃ​ការ​ចូល​ចត​នាវា​នេះ មាន​មន្ត្រី​កងទ័ព​ជើង​ទឹក​មូលដ្ឋាន​សមុទ្រ​រាម បាន​ដឹកនាំ​ប្រតិភូ​ទទួល​ស្វាគមន៍ និង​មន្ត្រី​ស្ថានទូត​ប្រទេស​ជប៉ុន​ប្រចាំ​នៅ​ព្រះរាជាណាចក្រ​កម្ពុជា​ជាច្រើន​នាក់ បាន​អញ្ជើញ​ទៅ​ទទួល​លោក​មេបញ្ជាការ និង​ក្រុម​នាវិក នៅ​លើ​នាវា ក្នុង​ទឹកមុខ​សប្បាយ​រីករាយ និង​រាក់ទាក់​ផង​ដែរ។

យោង​តាម​ប្រភព​ព័ត៌មាន​ពី​មន្ត្រី​កងទ័ព​ជើង​ទឹក​មូលដ្ឋាន​សមុទ្រ​រាម បាន​ប្រាប់​ថា នាវា​ទាំង ២ គ្រឿង​នេះ នឹង​ចូល​សំចត​រយៈពេល ២ ថ្ងៃ គិត​ចាប់ពី​ថ្ងៃ​ទី ២៤-២៦ ខែ​មេសា ឆ្នាំ ២០២៣ ដើម្បី​ធ្វើ​ទស្សនកិច្ច និង​រឹតចំណង​មិត្តភាព​រវាង​ប្រទេស​ទាំង ២ ព្រះរាជាណាចក្រ​កម្ពុជា និង​ព្រះរាជាណាចក្រ​ជប៉ុន។

មន្ត្រី​ដដែល​បាន​ឲ្យ​ដឹង​ថា លក្ខណៈ​បច្ចេកទេស​នាវា ៖

១-នាវា​ឈ្មោះ JS URAGA ( MST-463 )

-បណ្ដោយ ១៤១ ម៉ែត្រ

-ទទឹង ២២ ម៉ែត្រ

-ជម្រៅ​ទឹក ៥.៤ ម៉ែត្រ

-ទម្ងន់​ផ្ទុក ៥៦៥០ តោន

-Speed ២២knots ស្មើ ៤១ គីឡូម៉ែត្រ ក្នុង ១ ម៉ោង

-ចំនួន​នាវិក ២៥០ នាក់ ដឹកនាំ​ដោយ​មេបញ្ជាការ​នាវា លោក​វរនាវីទោ MATSUNAGA Akihi to។

២-នាវា​ឈ្មោះ JS AWAJI ( MSO-304 )

-បណ្ដោយ ៦៦.៨ ម៉ែត្រ

-ទទឹង ១១ ម៉ែត្រ

-ជម្រៅ​ទឹក ២.៧ ម៉ែត្រ

-ទម្ងន់​ផ្ទុក ៦៩០ តោន

-Speed ១៤ knots ស្មើ ២៦ គីឡូម៉ែត្រ ក្នុង ១ ម៉ោង

-ចំនួន​នាវិក ១៥០ នាក់ ដឹកនាំ​ដោយ​មេបញ្ជាការ​នាវា លោក​វរនាវីទោ TAGUCHI Takuma។

ប្រធាន​ប្រតិភូ លោក​វរនាវីឯក NAKAI RIICHI មេបញ្ជាការ​កងពលធំ​ទី ១ បោស​សំអាត​មីន ជា​ប្រធាន​ប្រតិភូ៕

អត្ថបទ ៖ ស៊ុយ ចាន់ធា