កម្ពុជានឹងមានភ្លៀងធ្លាក់លាយឡំ ផ្គរ រន្ទះ និងខ្យល់កន្ត្រាក់ដោយសារឥទ្ធិពលកម្រិតសម្ពាធទាប

ក្រសួងធនធានទឹក និងឧតុនិយមបានប្រកាសនៅថ្ងៃទី ២៥ ខែមេសា ឆ្នាំ ២០២៣ នេះថា ក្នុងអំឡុងមួយសប្តាហ៍ខាងមុខនេះ ចាប់ពីថ្ងៃទី ២៦ ខែមេសា ដល់ថ្ងៃទី ០២ ខែឧសភា ព្រះរាជាណាចក្រកម្ពុជា ទទួលរងនូវឥទ្ធិពលពីកម្រិតសម្ពាធទាបខ្សោយទៅមធ្យម និងខ្យល់ប្រែប្រួល។ ហើយនៅថ្ងៃខ្លះ ក៏នឹងអាចកើតមានឡើងនូវសម្ពាធទាបកម្ដៅ (Thermal Low) ផងដែរ។

បាតុភូតនេះនឹងធ្វើឲ្យតំបន់ទាំង ៣ របស់កម្ពុជា (តំបន់ទំនាបកណ្តាល តំបន់ខ្ពង់រាប តំបន់មាត់សមុទ្រ) អាចនឹងមានភ្លៀងធ្លាក់ក្នុងកម្រិតពីខ្សោយទៅមធ្យម និងអាចបង្ហូរនៅផ្នែកខ្លះលាយឡំទៅដោយផ្គរ រន្ទះ និងខ្យល់កន្ត្រាក់ ពិសេសបណ្តាខេត្តភាគពាយ័ព្យ។

ក្រសួងធនធានទឹកក៏អំពាវនាវឱ្យសាធារណជនបង្កើនការប្រុងប្រយ័ត្ន ចំពោះបាតុភូតធម្មជាតិដែលអាចកើតមានឡើងជាយថាហេតុ៕