នាវាខ្នាតយក្ស១គ្រឿងនាំអ្នកទេសចរវ័យចំណាស់ចូលទស្សកិច្ចនៅក្រុងព្រះសីហនុ

នាវាទេសចរណ៍ខ្នាតយក្សមួយគ្រឿងបានចូលចតនៅកំពង់ផែស្វយ័តក្រុងសីហនុនៅព្រឹកថ្ងៃទី ២៥ ខែមេសា ឆ្នាំ ២០២៣ ក្នុងដំណើរទស្សនកិច្ចរយៈពេល១ថ្ងៃដើម្បីឲ្យក្រុមអ្នកទេសចរវ័យចំណាស់ដើរលេងកម្សាន្តនៅតាមទីប្រជុំជន និងតំបន់រមណីដ្ឋានសំខាន់ៗក៏ដូចជានៅតាមទីវត្តអារាមនៅក្នុងក្រុងព្រះសីហនុ។

មន្ត្រីនគរបាលអន្តោប្រវេសន៍ច្រកទ្វារកំពង់ផែក្រុងព្រះសីហនុបានឲ្យដឹងថា នាវានេះមានឈ្មោះ EUROPA2 មានបណ្តោយប្រវែង ២២៥.៣៨ ម៉ែត្រ ទទឹងប្រវែង ២៩.៩០ ម៉ែត្រ និងជម្រៅ ៦.៣ ម៉ែត្រ មាននាវិកបម្រើការនៅលើនាវាសរុប ៣៦៧ នាក់ និងមានភ្ញៀវទេសចរ ៣៤៣ នាក់។

មន្ត្រីដដែលបានប្រាប់ទៀតថា នាវានេះបានធ្វើដំណើរមកពីប្រទេសវៀតណាមចូលចតនៅក្រុងព្រះសីហនុ បើតាមការគ្រោងទុកនាវាខ្នាតយក្សនេះនឹងធ្វើការចាកចេញពីកំពង់ផែស្វយ័តក្រុងព្រះសីហនុនៅម៉ោង ២២ យប់ ថ្ងៃដដែលឆ្ពោះទៅប្រទេសថៃ៕

ស៊ុយ ចាន់ធា