​មន្ត្រីកសិកម្ម និងម្ចាស់ចម្ការអះអាងដូចគ្នាថា តម្លៃទុរេន​ឆ្នាំនេះ​មានភាពល្អប្រសើរ​

ម្ចាស់ចម្ការទុរេន និងមន្ត្រីមន្ទីរកសិកម្មខេត្តកោះកុងបានអះអាងដូចគ្នាថា តម្លៃទុរេននៅឆ្នាំនេះ មានភាព​ល្អប្រសើរច្រើន ខណៈទិន្នផលធ្លាក់ចុះតិចតូចដោយសារអំណោយផលអាកាសធាតុ។​

ម្ចាស់ចម្ការ​ទុរេន​ នៅស្រុកស្រែអំបិល​ ខេត្តកោះកុង ​អ្នកស្រី អ៊ុំ ស្រីស្រស់បានប្រាប់ឱ្យដឹងថា នៅឆ្នាំនេះ ទិន្នផលទុរេននៅចម្ការទទួលបានផលល្អ ទាំងតម្លៃ និងគុណភាព លក់ចេញបោះដុំក្នុងតម្លៃជាង ២ ម៉ឺនរៀល ក្នុង១ គីឡូ។ អ្នកស្រីអះអាងថា តម្លៃឆ្នាំនេះ ប្រហាក់ប្រហែល និងឆ្នាំមុនដែរ។

លោក អ៊ី ម៉េងលាង ​ប្រធានមន្ទីរកសិកម្ម​ រុក្ខាប្រមាញ់​ និងនេសាទ​ ខេត្តកោះកុងបានឱ្យដឹងថា ជាទូទៅទុរេនចម្ការលក់ចម្លោះពី ២ ម៉ឺន ទៅ ២ ៥០០០ រៀល។ លោកបញ្ជាក់ថា ទិន្និផលឆ្នាំនេះ ថយជាងឆ្នាំមុនបន្តិច ដោយសារតែអាកាសធាតុប្រែប្រួល មិនអំណោយផលធ្វើឱ្យការចេញផ្កាទុរេនជ្រុះអស់។

ទោះយ៉ាងណា ក៏កសិករមួយចំនួនបានលើកឡើងថា សម្រាប់ឆ្នាំនេះទិន្នផលផ្លែទុរេន បានហុចផលច្រើនជាងឆ្នាំទៅមុន ទោះបីជាមានទឹកភ្លៀងធ្លាក់តិចតួចយ៉ាងណាក្តី ក៏ដោយសារការប្រឹងប្រែងថែទាំរហូតដល់ពេលប្រមូលដូចពេលនេះ។

ផ្ទៃដីដាំទុរេននៅខេត្តកោះកុងប្រមាណ ៥០០ ហិកតា ខណៈទិន្នផលមិនអាចកំណត់បាននៅឡើយនោះទេ គ្រាន់តែថ្មបាំងមួយកន្លែងទទួលទិន្នផលបានប្រមាណ ២០០ តោន៕

អត្ថបទ៖ ឡេង ដេត