អតីតតារាជើងចាស់ លោក សម តារា បានឈរជាបេក្ខជនតំណាងរាស្ត្រមណ្ឌលស្វាយរៀង

អតីតអ្នកសម្ដែងជើងចាស់ កាលទស្សវត្សន៍ឆ្នាំ៩០ លោក សម តារា ត្រូវបានថ្នាក់ដឹកនាំគណបក្សប្រជាជនកម្ពុជា ចាត់តាំងជាបេក្ខជនឈរឈ្មោះតំណាងរាស្រ្តមណ្ឌលខេត្តស្វាយរៀងសម្រាប់ការបោះឆ្នោតថ្នាក់ជាតិ នីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខ។

យោងតាមសេចក្ដីសម្រេចរបស់គណបក្សប្រជាជនកម្ពុជា បានសម្រេចតែងតាំងលោក សម តារា ជាបេក្ខជនពេញសិទ្ធិក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ មណ្ឌលខេត្តស្វាយរៀង ដោយលោកឈរនៅលេខរៀងទី៤។

សេចក្ដីសម្រេចដដែល ក៏បានតែងតាំងសម្ដេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា ជាបេក្ខជនពេញសិទ្ធិលេខរៀងទី១ លោកស្រី ដួង វណ្ណា ជាបេក្ខជនពេញសិទ្ធិលេខរៀងទី២ និងបេក្ខជនលេខរៀងទី៣ គឺលោក ជ័យ សុន ខណៈអភិបាលរងខេត្តស្វាយរៀង លោកស្រី ឯក សុវណ្ណភារៈ ត្រូវឈរជាបេក្ខជនពេញសិទ្ធិលេខរៀងទី៥។

ដោយឡែក លោក រស់ ផារិទ្ធ លោកស្រី ពៅ សុភាព លោកស្រី ប្រាក់ ពុទ្ធី លោក ប៊ុន សាវ៉ាន់ និងលោក ថាច់ រតនា ឈរជាបេក្ខជនបម្រុងនៃបញ្ជីបេក្ខជនឈរឈ្មោះបោះឆ្នោតរបស់គណបក្សប្រជាជនកម្ពុជា មណ្ឌលខេត្តស្វាយរៀង។

សូមជម្រាបថា លោក សម តារា បច្ចុប្បន្នមានឋានន្តរស័ក្តិជានាយឧត្តមសេនីយ៍ នៃនាយនគរបាលជាតិ ដែលមានមុខតំណែងជាអនុរដ្ឋលេខាធិការក្រសួងមហាផ្ទៃ។

មុនការតែងតាំងជាអនុរដ្ឋលេខាធិការ លោក សម តារា ធ្លាប់មានតួនាទីជាអគ្គនាយករងនៃអគ្គនាយកដ្ឋានភស្តុភា និងហិរញ្ញវត្ថុ ក្រសួងមហាផ្ទៃផងដែរ៕

ដោយ៖ ធឿន វ៉ាន់សុង