អ្នកកាសែតអន្តរជាតិមកពី ៦ស្ថាប័នហើយ ត្រូវបាន គ.ជ.ប ទទួលស្គាល់សម្រាប់ការយកព័ត៌មានអំពីដំណើរការបោះឆ្នោត

គិតត្រឹមព្រឹកថ្ងៃទី ២៦ ខែមេសា ឆ្នាំ ២០២៣នេះ គណៈកម្មាធិការជាតិរៀបចំការបោះឆ្នោត​ (គ.ជ.ប) បានសម្រេចទទួលស្គាល់ជាផ្លូវការនូវអ្នកសារព័ត៌មានជាតិ-អន្តរជាតិចំនួន ១០៤នាក់ហើយ សម្រាប់ចូលរួមការយកព័ត៌មានអំពីដំណើរការបោះឆ្នោតជ្រើសតាំងតំណាងរាស្រ្ត នីតិកាលទី ​៧។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ២៦ ខែមេសានេះថា ចាប់ពីថ្ងៃទី ១ ដល់ថ្ងៃទី ២៦ ខែមេសា ឆ្នាំ ២០២៣នេះ គ.ជ.ប បានសម្រេចទទួលស្គាល់អ្នកសារព័ត៌មានជាតិមកពី ៥អង្គភាពចំនួន ៩៥នាក់។ ចំណែកអ្នកសារព័ត៌មានអន្តរជាតិ ៩នាក់ មកពី ៦ស្ថាប័ន ក៏ត្រូវបាន គ.ជ.ប សម្រេចទទួលស្គាល់ជាផ្លូវការដែរ។

អ្នកសារព័ត៌មានអន្តរជាតិចំនួន ៩នាក់ មកពី ៦ស្ថាប័ន រួមមាន៖ ស្ថាប័នសារព័ត៌មាន Thomson Reuterចំនួនម្នាក់, European Press photo Agency (EPA)ចំនួនម្នាក់,​ The Asahi Shimbunចំនួនម្នាក់, ទូរទស្សន៍ជប៉ុន NHK TVចំនួន ៣នាក់, កាសែតវៀតណាម Nhan Danចំនួន ២នាក់, និងមកពីកាសែត Khmer Timesចំនួនម្នាក់។ ក្នុងនោះដែរ គ.ជ.ប កំពុងពិនិត្យលើពាក្យស្នើសុំរបស់អ្នកសារព័ត៌មានអន្តរជាតិចំនួន ៣នាក់ មកពីស្ថាប័នទីភ្នាក់ងារសារព័ត៌មានជប៉ុន Kyodo News ផងដែរ។

សូមជម្រាបថា ការទទួលពាក្យសុំចុះឈ្មោះអ្នកសារព័ត៌មានជាតិ ដើម្បីចូលរួមយកព័ត៌មានក្នុងដំណើរការ នៃការរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី ៧ ចាប់ផ្ដើម​ពី​ថ្ងៃទី ១ ខែមេសា ដល់ថ្ងៃទី ១២ ខែកក្កដា ឆ្នាំ ២០ ២៣។ ចំណែកអ្នកសារព័ត៌មានអន្តរជាតិ ចាប់​ផ្តើ​​​ម​ពី​ថ្ងៃទី ១ ខែមេសា ដល់ថ្ងៃទី ១៩ ខែកក្កដា ឆ្នាំ ២០២៣៕

អត្ថបទ៖ ឃួន សុភ័ក្រ