ស្នងការរាជធានី ត្រៀមកម្លាំងជាង ៣ពាន់នាក់ ដើម្បីការពារសន្តិសុខសណ្ដាប់ធ្នាប់ និងសម្រួលចរាចរណ៍ក្នុងព្រឹត្តិការណ៍ស៊ីហ្គេម

សម្រាប់​​​ព្រឹត្តិការណ៍កីឡាស៊ីហ្គេមលើកទី ៣២ ដែលព្រះរាជាណាចក្រកម្ពុជាធ្វើជាម្ចាស់ផ្ទះនោះ គឺស្នងការដ្ឋាននគរបាលរាជធានីភ្នំពេញ បានត្រៀមកម្លាំងចម្រុះជាង ៣ពាន់នាក់ ដើម្បីការពារសន្តិសុខសណ្ដាប់ធ្នាប់ និងសម្រួលចរាចរណ៍។

លោកឧត្ដមសេនីយ៍ត្រី សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២៨ ខែមេសានេះថា ស្នងការដ្ឋាននគរបាលរាជធានីភ្នំពេញ បានត្រៀមកម្លាំងចម្រុះជាង ៣ពាន់នាក់ ដើម្បីការពារសន្តិសុខសណ្ដាប់ធ្នាប់ និងសម្រួលចរាចរណ៍ ក្នុ​ង​​​ព្រឹត្តិការណ៍កីឡាស៊ីហ្គេមលើកទី ៣២ ដែលព្រះរាជាណាចក្រកម្ពុជាធ្វើជាម្ចាស់ផ្ទះ។

អ្នកនាំពាក្យរូបនេះ ឲ្យដឹងថា «ក្រោមការបញ្ជាផ្ទាល់របស់ឯកឧត្ដម ឧត្ដមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ គឺយើងប្រើប្រាស់កម្លាំងរួមជាង ៣ពាន់ ៤រយនាក់ ក្នុងនោះ មានទាំងកម្លាំងត្រៀមអន្តរាគមន៍ កម្លាំងល្បាត កម្លាំងអគ្គិភ័យ ជាពិសេសគឺកម្លាំងសម្រួលចរាចរណ៍ និងសណ្ដាប់ធ្នាប់»។

បន្ថែមពីលើនេះ ស្នងការដ្ឋាននគរបាលរាជធានីភ្នំពេញ ក៏បានត្រៀមកម្លាំងប្រចាំបញ្ជាមួយចំនួនទៀត នៅពេលមានករណីចាំបាច់ណាមួយ ដែលត្រូវប្រើប្រាស់កម្លាំងអន្តរាគមន៍។ នេះបើតាមលោកឧត្ដមសេនីយ៍ត្រី សាន សុខសីហា ដដែល។

សូមជម្រាបថា ព្រឹត្តិការណ៍កីឡាស៊ីហ្គេមលើកទី ៣២ ដែលព្រះរាជាណាចក្រកម្ពុជា ធ្វើជាម្ចាស់ផ្ទះរៀបចំ នឹងត្រូវ​បើ​ក​ជា​ផ្លូ​វ​កា​រ​នៅ​ថ្ងៃ​ទី​ ​៥ ខែឧសភា រហូតដល់ថ្ងៃទី ១៧ ខែឧសភា ឆ្នាំ ២០២៣។

លោកឧត្តមសេនីយ៍ឯក ឆាយ គឹមខឿន អ្នកនាំពាក្យ នៃ​​អគ្គស្នងការដ្ឋាននគរបាលជាតិ មានប្រសា​សន៍ប្រាប់ទីភ្នាក់ងារសារព័ត៌មានកម្ពុជា (AKP) កាលពីថ្ងៃទី ២៧ ខែមេសាថា ប្រទេសកម្ពុជា បានត្រៀមកម្លាំងសរុប​ប្រ​មា​ណ ​២​ម៉ឺននាក់ ដើម្បីការពារសន្តិសុខសណ្ដាប់ធ្នាប់ និងសម្រួលចរាចរណ៍ សម្រាប់ព្រឹត្តិការណ៍កីឡាស៊ីហ្គេមនេះ៕