ព័ត៌មានជាតិ

អ្នកនិពន្ធ ៖ សៀវភៅ(កម្ពុជាសម័យតេជោ) នឹងបង្ហាញពីសមិទ្ធផលដ៏ធំធេងនានា នៃម្លប់សន្តិភាព

បានផុស

២ years មុន

នៅ

ថ្ងៃសៅរ៍ ២៩ មេសា ២០២៣

ដោយ

ថ្លែងប្រាប់អ្នកសារព័ត៌មាន នៅថ្ងៃនេះ លោក ពៅ សុខ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ ដែលជាអ្នករៀបរៀងសៀវភៅ (កម្ពុជាសម័យតេជោ) បានឲ្យដឹងថា សៀវភៅដែលមានកម្រាស់ជិត ៧០០ ទំព័រនេះ លោកបានបញ្ចប់ការរៀបរៀងជំហានបឋមរួចរាល់ជាស្ថាពរហើយ ហើយនឹងត្រូវបញ្ចូលទៅកាន់រោងពុម្ពក្នុងពេលឆាប់ៗនេះ បន្ទាប់ពីលោកចំណាយពេលរៀបរៀងប្រមាណជាង ៦ ខែ ដើម្បីរៀបរៀងរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពៅ សុខ បញ្ជាក់ថា សៀវភៅ(កម្ពុជាសម័យតេជោ) ពុំមែនជាសៀវភៅប្រវត្តិសាស្ត្រនោះទេ តែជាកម្រងឯកសារដែលលោកចងក្រងរៀបរាប់ពីសមិទ្ធផលដ៏ធំធេងមហាសាលនានា ក្រោមម្លប់សន្តិភាព នៃ សម្ដេចតេជោ បិតាសន្តិភាពរបស់ កម្ពុជា ដែលព្យាយាមធ្វើឲ្យមានឡើងវិញពី កម្ពុជាគ្មានអ្វីសោះ ឬអាចហៅថា កម្ពុជា នៃការកើតឡើងវិញពីគំនរផេះផង់ ពីចំណុចសូន្យ រហូតមានអ្វីៗគ្រប់យ៉ាង រាប់ចាប់ពីសេរីភាព នៃជំនឿសាសនា ការជ្រើសរើសគូស្រករ ការនិយាយស្ដី ឬហៅថា សេរីភាព នៃការបញ្ចេញមតិ និងលទ្ធប្រជាធិបតេយ្យដូចបណ្ដាប្រទេសនានា នៅលើលោកដែរ។

លោកបានលើកឡើងថា ប្រសិនបើមានចម្ងល់ ឬចង់ដឹងថា រាជរដ្ឋាភិបាលកម្ពុជាបច្ចុប្បន្ន ក្រោមការដឹកនាំរបស់ សម្ដេចតេជោ បិតាសន្តិភាព បានធ្វើអ្វីខ្លះ ឬថា តើកម្ពុជាសម័យតេជោ ឬតាមបណ្ដាខេត្តមួយចំនួនមានអ្វីខ្លះ សៀវភៅ (កម្ពុជាសម័យតេជោ) អាចពន្យល់ និងលាតត្រដាងបានគ្រប់ជំពូក។ ជាពិសេស មិត្តអ្នកអាន នឹងបានជ្រាបថា ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ទទួលបាននូវពានរង្វាន់ពិភពលោកអ្វីខ្លះ? ទទួលបាននូវសញ្ញាបត្រកម្រិតថ្នាក់បណ្ឌិតកិត្តិយសពីបណ្ដាប្រទេសណាខ្លះ? និងក្នុងកិច្ចប្រជុំអាស៊ាន ឆ្នាំ ២០២៣ ដែលកម្ពុជាធ្វើជាប្រធាន និងជាម្ចាស់ផ្ទះ នៃកិច្ចប្រជុំ តើ កម្ពុជា ទទួលបានការគាំទ្រ និងកោតសរសើរពីបណ្ដាមេដឹកនាំពិភពលោកណាខ្លះ?

សមាជិកក្រុមប្រឹក្សាភិបាលសមាគមអ្នកនិពន្ធខ្មែររូបនេះ បញ្ជាក់ទៀតថា តាមការគ្រោងទុក សៀវភៅ(កម្ពុជាសម័យតេជោ) នឹងត្រូវបោះពុម្ពជំហានដំបូងចំនួន ២៥០០ ច្បាប់ ហើយក្រោយពីការបោះពុម្ពរួចរាល់ សៀវភៅនេះ នឹងមានដាក់លក់នៅតាមបណ្ណាគារនានា ក្នុងរាជធានីភ្នំពេញ និងក៏អាចមានការប្រគេន ឬចែកជូនដោយឥតគិតថ្លៃ ចំពោះមិត្តអ្នកអានទាំងឡាយ ដែលនិយមការអាន និយមការស្រាវជ្រាវ ហើយពុំមានលទ្ធភាពជាវផងដែរ៕