លោកបណ្ឌិត គិន ភា ៖ ប្រជាជនតាមតំបន់ទន្លេមេគង្គ​នៅខ្វះខាត​ក្នុងការទទួលបានព័ត៌មាន

ក្នុងកិច្ចសម្ភាសន៍ជាមួយអ្នកសារព័ត៌មាន លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា យល់ថា បច្ចុប្បន្ននេះប្រជាជនដែលរស់នៅក្នុងតំបន់ទន្លេមេគង្គនៅមិនទាន់ទទួល​បានព័ត៌មានជុំវិញតំបន់ខ្លួនរស់នៅបានទូលំទូលាយនៅឡើយទេ។

ដោយមានការយល់ឃើញបែបនេះ ទើបរាជបណ្ឌិត្យសភាកម្ពុជា និងក្លិបអ្នកកាសែតកម្ពុជា បានរៀបចំសិក្ខា​សាលាបណ្តុះ​បណ្តាលសារព័ត៌មានក្នុងតំបន់មេគង្គលើកទី២ ដែលមានអ្នកកាសែតមក​ពី៦ប្រទេសក្នុង​តំបន់ទន្លេមេគង្គ មានដូចជា ចិន វៀតណាម មីយ៉ាន់ម៉ា ឡាវ ថៃ និងកម្ពុជា ដើម្បីផ្សព្វផ្សាយបន្ថែមដល់ប្រជាជនក្នុងតំបន់។ សិក្ខាសាលានេះ រៀបចំរយៈពេល៣ថ្ងៃ ចាប់ពីថ្ងៃទី២៦ ដល់ទី២៨ ខែមេសា ឆ្នាំ២០២៣ មានអ្នកចូលរួមចំនួន៧១នាក់។ គោលបំណងនៃសិក្ខាសាលា គឺដើម្បីឱ្យអ្នកសារព័ត៌មានបានដឹងពីទីតាំងភូមិសាស្ត្រ ប្រព័ន្ធនយោបាយ ការបោះឆ្នោត សង្គម បញ្ហាបរិស្ថាន និងវប្បធម៌ប្រពៃណីក្នុងប្រទេសនៅតំបន់ទន្លេមេគង្គ។

លោកបណ្ឌិត គិន ភា មានប្រសាសន៍ថា៖ “យើងរកឃើញថា តួនាទីរបស់ប្រព័ន្ធផ្សព្វផ្សាយមានសារសំខាន់​ណាស់នៅក្នុងតំបន់អាស៊ានរបស់យើង ជាពិសេសតំបន់ទន្លេមេគង្គ។ អ៉ីចឹងហើយ យើងចង់ឱ្យប្រព័ន្ធផ្សព្វផ្សាយ ដើរតួនាទីសំខាន់បន្ថែមទៀត នៅក្នុងការរួមចំណែកថែរក្សាបរិស្ថាននៅក្នុងតំបន់មេគង្គ គុណភាពទឹក ហើយជាពិសេសគឺធ្វើឱ្យមានការយល់គ្នាក្នុងចំណោមប្រជាជននៃតំបន់មេគង្គរបស់យើង”។

លោកបណ្ឌិតបានបន្តថា អ្នកសារព័ត៌មានដើរតួនាទីសំខាន់ណាស់។ នៅពេលដែលអ្នកសារព័ត៌មាន​បានយល់ពីបញ្ហាផ្សេងៗក្នុងតំបន់មេគង្គបានច្រើន នឹងធ្វើឱ្យប្រជាជននៅតំបន់មេគង្គមានការយល់គ្នាកាន់តែច្រើន ហើយព័ត៌មានដែលប្រជាជនទទួលបាន ក៏ធ្វើឱ្យគាត់មានមូលដ្ឋានច្បាស់លាស់ក្នុងការសម្រេចចិត្តបានត្រឹមត្រូវផងដែរ។

លោកបានសង្កត់ធ្ងន់ថា មិនត្រឹមតែប្រជាពលរដ្ឋរស់នៅតំបន់ទន្លេមេគង្គមិនបានទទួលព័ត៌មានទូលំទូលាយប៉ុណ្ណោះទេ សូម្បីតែព័ត៌មានតាមប្រព័ន្ធអ៉ីនធឺនេត ជុំវិញទន្លេមេគង្គក៏នៅមានកម្រិត មិនសូវសម្បូរផងដែរ។ ភាគច្រើន ព័ត៌មានដែលបានផ្សព្វផ្សាយគឺជាភាសាអង់គ្លេស ឬបារាំងជាដើម។ ទាំងនេះជាផលពិបាកសម្រាប់​ប្រជាជនដែលរស់នៅក្នុងតំបន់មេគង្គក្នុងការទទួលបានព័ត៌មាន ព្រោះប្រជាជនគឺប្រើភាសាជាតិរបស់ខ្លួន។

លោកបណ្ឌិត គិន ភា ក៏បានជុំរុញតាមរយៈសិក្ខាសាលានេះ ដោយលើកទឹកចិត្តរបស់អ្នកសារព័ត៌មាន​ក្នុងតំបន់ទន្លេមេគង្គផ្សព្វផ្សាយជាភាសាជាតិរបស់ខ្លួន ឬ ប្រសិនជាមានអត្ថបទណាល្អដែលទាក់ទងជាមួយទន្លេមេគង្គ គឺលើកទឹកចិត្តឱ្យមានការបកប្រែជាភាសាជាតិរៀងៗខ្លួន ដើម្បីឱ្យប្រជាជនអាចទទួលបានព័ត៌មានគ្រប់គ្រាន់ និងកាន់តែទូលំទូលាយបន្ថែមទៀត។

ដើម្បីបន្តជំរុញឱ្យមានការយកចិត្តទុកដាក់នៅតាមតំបន់ទន្លេមេគង្គបន្ថែមទៀត រាជបណ្ឌិត្យសភាកម្ពុជា មានគម្រោងបន្តបង្កើតសិក្ខាសាលាបណ្តុះបណ្តាលបែបនេះបន្ថែមទៀត ក្នុងទម្រង់ផ្សេងៗគ្នាក្នុងពេលខាងមុខ៕

ដោយ៖ អុន ស្រីមាន