ភ្លៀងលាយឡំផ្គររន្ទះបាញ់សត្វគោមួយក្បាល និងបំផ្លាញផ្ទះពលរដ្ឋមួយចំនួននៅខេត្តបាត់ដំបង

ខ្យល់កន្ត្រាក់បានបន្តវាយបំផ្លាញលំនៅឋានរបស់ប្រជាពលរដ្ឋខ្ទេចខ្ទីយ៉ាងដំណំ ខណ:ពេលដែលមានភ្លៀងធ្លាក់មួយមេយ៉ាងធំ ព្រមទាំងមានរន្ទះបាញ់សម្លាប់សត្វគោមួយក្បាលផងដែរ។

ហេតុការណ៍នៃគ្រោះធម្មជាតិនេះ បានកើតឡើងនៅថ្ងៃទី១ ខែឧសភា ឆ្នាំ២០២៣ វេលាម៉ោង៦និង៤៥នាទីល្ងាច ដោយ មានភ្លៀងធ្លាក់មួយមេលាយឡំខ្យល់កន្រ្តាក់ ផ្គររន្ទះ បានបាញ់ទៅលើសត្វគោងាប់១ក្បាល នៅចំណុចភូមិអូរចម្លង ឃុំតាសែន ស្រុកកំរៀង ខេត្តបាត់ដំបង។

ដោយឡែកនៅភូមិបឹងប្រី ឃុំស្នឹង ស្រុកបាណន់ ក៏មានភ្លៀងធ្លាក់មួយមេលាយឡំដោយខ្យល់កន្ត្រាក់បានបោកបំផ្លាញផ្ទះប្រជាពលរដ្ឋបណ្តាលអោយបាក់បែកចំនួន៤ខ្នងផ្ទះ រោងដាក់គោយន្តចំនួន២ និងរោងចិញ្ចឹមមាន់ខ្នាតធំមួយខ្នង ប៉ុន្តែករណីនេះមិនមានគ្រោះថ្នាក់ដល់មនុស្សឡើយ៕

អត្ថបទ៖ សោ និយមរ័ត្ន