ព័ត៌មានជាតិ

ព្រឹត្តិការណ៍ស៊ីហ្គេម កម្ពុជា ផ្ដល់ជូនការប្រើប្រាស់សេវាអ៊ីនធឺណិតល្បឿនលឿន ១៨៦ ទីតាំង ដោយឥតគិតថ្លៃ

បានផុស

២ years មុន

នៅ

ថ្ងៃអង្គារ ២ ឧសភា ២០២៣

ដោយ

ក្រសួងប្រៃសណីយ៍ និងទូរគមនាគមន៍ សហការជាមួយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ និងអាស៊ានប៉ារ៉ាហ្គេម លើកទី ១២ ឆ្នាំ ២០២៣ បានផ្តល់ជូនការប្រើប្រាស់សេវាអ៊ីនធឺណិតល្បឿនលឿនដោយឥតគិតថ្លៃ នៅពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោ ចំនួន ១៨៦ ទីតាំង ដើម្បីជួយសម្រួលដល់អ្នកចូលរួមទស្សនាក្នុងការប្រកួតនានាប្រកបដោយរលូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងប្រៃសណីយ៍ និងទូរគមនាគមន៍ បានបង្ហោះនៅក្នុងតេឡេក្រាម នៅព្រឹកថ្ងៃទី ២ ឧសភានេះថា ដើម្បីចូលរួមគាំទ្រដល់ព្រឹត្តិការណ៍ស៊ីហ្គេមលើកទី ៣២ (32nd SEA Games) និងអាស៊ានប៉ារ៉ាហ្គេមលើកទី ១២ (12th ASEAN Para Games) ដែលកម្ពុជាធ្វើជាម្ចាស់ផ្ទះក្នុងឆ្នាំ ២០២៣ នេះ ប្រព្រឹត្តទៅកាន់តែអស្ចារ្យ និងសប្បាយរីករាយ ក្រសួងប្រៃសណីយ៍ និងទូរគមនាគមន៍ សហការជាមួយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ និងអាស៊ានប៉ារ៉ាហ្គេម លើកទី ១២ ឆ្នាំ ២០២៣ ផ្តល់ជូនការប្រើប្រាស់សេវាអ៊ីនធឺណិតល្បឿនលឿនដោយឥតគិតថ្លៃ នៅពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោ ចំនួន ១៨៦ ទីតាំង។

ក្រសួងប្រៃសណីយ៍ បានបន្តថា ទីតាំងទាំងនោះរួមមាន ៖

-សាលក្នុងពហុកីឡាដ្ឋាន (Indoor Hall)

-សាលទស្សនិកជន VIP (VIP Audiences)

– សាលទស្សនិកជនខាងក្រៅ (Outdoor Audiences)

– វិមានកីឡដ្ឋាន

-មណ្ឌលកីឡាហែលទឹក

-មណ្ឌលកីឡាហុកគី

-មណ្ឌលកីឡាក្នុងសាល

-មណ្ឌលកីឡាវាយសី និងវាយកូនឃ្លីលើតុ

-មណ្ឌលកីឡាវាយកូនបាល់

– សាលហាត់កីឡាប្រយុទ្ធ

-តំបន់សាធារណៈខាងក្រៅពហុកីឡដ្ឋាន។

ជាមួយគ្នានេះដែរ ក្រសួងប្រៃសណីយ៍ បានណែនាំឲ្យស្កេន QR Code ក្នុងរូបខាងលើនេះ ឬផ្ទាំងបង្ហាញនៅតាមទីតាំងជាក់ស្ដែង ដែលបានកំណត់ ដើម្បីភ្ជាប់ WiFi។

គួរបញ្ជាក់ថា កម្ពុជា នឹងធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ លើកទី ៣២ ចាប់ពីថ្ងៃទី ៥ ខែឧសភា ដល់ថ្ងៃទី ១៧ ខែឧសភា ឆ្នាំ ២០២៣ និងរៀបចំការប្រកួតកីឡាអាស៊ានប៉ារ៉ាហ្គេមលើកទី ១២ ចាប់ពីថ្ងៃទី ៣ ដល់ថ្ងៃទី ៩ ខែមិថុនា ឆ្នាំ ២០២៣ ខាងមុខនេះ៕

អត្ថបទ ៖ សំអឿន