ព័ត៌មានជាតិ

ខេត្តកំពតបន្តជំរុញបញ្ចប់ ការបោះបង្គោលព្រំដែនជាមួយប្រទេសវៀតណាម

បានផុស

២ years មុន

នៅ

ថ្ងៃអង្គារ ២ ឧសភា ២០២៣

ដោយ

ខេត្តកំពតដែលមានខ្សែបន្ទាត់ព្រំដែនប្រវែងជាង ៤០ គីឡូម៉ែត្រជាមួយប្រទេសវៀតណាម កំពុងជំរុញបញ្ចប់ការបោះបង្គោលព្រំដែន ដើម្បីបង្កើតបានខណ្ឌសីមាព្រំដែនច្បាស់លាស់។

លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានឲ្យកម្ពុជាថ្មីដឹងតាមទូរសព្ទនៅព្រឹកនេះថា ការបោះបង្គោលព្រំដែនក្នុងខេត្តកំពតជាមួយប្រទេសវៀតណាម នៅសល់ចំណុចមួយចំនួនមិនទាន់ឯកភាពគ្នា។

លោកបញ្ជាក់យ៉ាងដូច្នេះថា «បច្ចុប្បន្ននៅសល់បង្គោលព្រំដែនចំនួន ៥ ទៀតមិនទាន់ឯកភាពគ្នា ចាប់ពីបង្គោលលេខ ២៩៦ ដល់ ៣០០»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា គណៈកម្មការព្រំដែនកំពុងបន្តធ្វើការជាមួយភាគីវៀតណាម ដើម្បីជំរុញបញ្ចប់ការបោះបង្គោលព្រំដែនដែលនៅសេសសល់ ធ្វើយ៉ាងណាឲ្យចប់រួចរាល់ដើម្បីធានាបានទាំំងសន្តិសុខ និងកិច្ចការពារដល់បូរណភាពទឹកដី។

ជុំវិញបញ្ហាសន្តិសុខនៅតាមខ្សែបន្ទាត់ព្រំដែន លោកស្នងការនគរបាលខេត្តកំពតបញ្ជាក់ដែរថា មិនមានបញ្ហាអីនោះទេ ដោយកងកម្លាំងភាគីទាំងពីរតែងតែចុះល្បាតជាប់ជាប្រចាំ និងរាយការណ៍ឲ្យគ្នាទៅវិញទៅមកករណីមានបញ្ហាណាមួយកើតឡើង។

ខេត្តកំពតមានព្រំដែនជាប់ខេត្តកៀនយ៉ាងរបស់ប្រទេសវៀតណាមប្រវែង ៤២,៣ គីឡូម៉ែត្រ។ មានចម្ងាយជាង ១៤៨ គីឡូម៉ែត្រពីរាជធានីភ្នំពេញ ខេត្តល្បីទុរេននេះមានសក្ដានុពលលើវិស័យទេសចរណ៍ មានស្ទឹង ព្រែក កោះ ឧទ្យានជាតិ ព្រៃកោងកាង និងធនធានធម្មជាតិដ៏សំបូរបែប។

ក្នុងឱកាសចូលរួមក្នុងពិធីអបអរបុណ្យរុក្ខទិវាកាលពីឆ្នាំ ២០២២ លោក ម៉ៅ ធនិន អភិបាលនៃគណៈអភិបាលខេត្តកំពតបានអំពាវនាវដល់ប្រជាពលរដ្ឋរស់នៅតាមតំបន់ព្រំដែនកម្ពុជា-វៀតណាម ចូលរួមដាំដើមត្នោតជាអត្តសញ្ញាណជាតិ។

លោកអភិបាលខេត្តលើកឡើងថា ដើមត្នោតគឺជាកេរ្តិ៍ដំណែលរបស់ដូនតាខ្មែរជាយូរលង់ណាស់មកហើយ។ ដូចនេះក្នុងនាមជាពលរដ្ឋខ្មែរ ពិសេសពលរដ្ឋរស់នៅតំបន់ព្រំដែនត្រូវស្រឡាញ់ ថែរក្សានិងចូលរួមដាំដើមត្នោតយ៉ាងតិចមួយគ្រួសារឲ្យបាន ៣ ទៅ ៤ ដើមក្នុងមួយឆ្នាំ៕