គណបក្សនយោបាយចំនួន ១០ហើយ បានស្នើសុំចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត

គិតត្រឹមព្រឹកថ្ងៃទី ៣ ខែឧសភា ឆ្នាំ ២០២៣នេះ មានគណបក្សនយោបាយចំនួន ១០ហើយ បានស្នើសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី ៧។ នេះបើតាមអ្នកនាំពាក្យ​ គ.ជ.ប។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅព្រឹកថ្ងៃពុធនេះថា ក្នុងចំណោមគណបក្សនយោបាយទាំង ១០នោះ គ.ជ.ប បានសម្រេចទទួលស្គាល់ចំនួន ៧គណបក្ស ហើយគណបក្សចំនួន ៣ទៀត គឺ គ.ជ.ប បាននិងកំពុងពិនិត្យ។

លោក សោម សូរីដា ឲ្យដឹងថា «ក្នុងចំណោម ១០គណបក្សនេះ គឺគណៈកម្មាធិការជាតិរៀបចំការបោះឆ្នោត បានសម្រេចទទួលស្គាល់ជាផ្លូវការ​ ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជននោះ ចំនួន ៧គណបក្ស នៅសល់ ៣គណបក្សទៀត គ.ជ.ប កំពុងពិនិត្យទៅលើឯកសារ និងលក្ខខណ្ឌ ដែលគណបក្សបានផ្ញើមកគណៈកម្មាធិការជាតិរៀបចំការបោះឆ្នោត ក្នុងការចុះបញ្ជីគណបក្សនយោបាយ បញ្ជីបេក្ខជនឈរឈ្មោះបោះឆ្នោត»។

គណបក្សនយោបាយទាំង ១០ ដែលបានស្នើសុំចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតនោះ រួមមាន៖ គណបក្សប្រជាជនកម្ពុជា, គណបក្សយុវជនកម្ពុជា, គណបក្សខ្មែររួបរួមជាតិ, គណបក្សធម្មាធិបតេយ្យ, គណបក្សខ្មែរតែមួយ, គណបក្សសញ្ជាតិកម្ពុជា, គណបក្សខ្មែរអភិរក្ស, គណបក្សហ៊្វុនស៊ិនប៉ិច និងគណបក្សសំបុកឃ្មុំសង្គមប្រជាធិបតេយ្យ។

សូមជម្រាបថា ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ មានរយៈពេល ១៥ថ្ងៃ គឺចាប់ពីថ្ងៃទី ២៤ ខែមេសា ដល់ថ្ងៃទី ៨ ខែឧសភា ឆ្នាំ ២០២៣៕​

អត្ថបទ៖ ឃួន សុភ័ក្រ