ដើម​ខែ​ឧសភា រោងចក្រថ្មីផលិតទឹកស្អាត​បាន ២០ ម៉ឺនម៉ែត្រគូបបន្ថែម​ទៀត​​ដាក់​ឲ្យ​ដំណើរការ

នៅដើមខែឧសភា ឆ្នាំ២០២៣នេះ រោងចក្រផលិតទឹកស្អាតថ្មី ដែលអាច​ផលិតចែកចាយទឹកស្អាតបានប្រមាណ ២០ ម៉ឺន​ម៉ែត្រ​គូបក្នុងមួយថ្ងៃបន្ថែមលើសមត្ថភាពផលិតបច្ចុប្បន្ន នឹង​ដាក់​ឲ្យដំណើរការជា​ផ្លូវការ។

តាម​សេចក្តីជូនដំណឹងរបស់​រដ្ឋាករទឹកស្វយ័តក្រុង​ភ្នំពេញ​ (រ.ទ.ស.ភ) បាន​បញ្ជាក់​ថា នៅដើមខែឧសភា ឆ្នាំ២០២៣ នេះ រោងចក្រផលិតទឹកស្អាតថ្មី នឹងផលិតចែកចាយទឹកស្អាតបានក្នុងបរិមាណ ២០ ម៉ឺនម៉ែត្រគូបក្នុងមួយថ្ងៃ បន្ថែមលើសមត្ថភាពផលិតបច្ចុប្បន្ន ៦៤ម៉ឺន ម៉ែត្រគូបក្នុងមួយថ្ងៃ។ ពោលសមត្ថភាពផលិតនឹង​កើន​ដល់ ៨៤ ម៉ឺនម៉ែត្រគូបក្នុងមួយថ្ងៃ ធៀបនឹងតម្រូវការទឹកស្អាត ៨៩ ម៉ឺនម៉ែត្រគូបក្នុងមួយថ្ងៃ ដែលអាច​ដោះស្រាយបញ្ហាខ្វះទឹកស្អាតបានជាង ៩០%​នៅរាជធានី​ភ្នំពេញ។

ដោយឡែកចាប់ពីដើមឆ្នាំ​២០២៤ រដ្ឋាករទឹកស្វយ័តក្រុង​ភ្នំពេញនឹងអាចផលិតទឹកស្អាតបាន ២០ ម៉ឺនម៉ែត្រគូបក្នុងមួយថ្ងៃបន្ថែមទៀត ដែលធ្វើឲ្យសមត្ថភាពសរុបមានរហូតដល់ជាង ១ លាន ម៉ែត្រគូបក្នុងមួយថ្ងៃ។

យោងតាមរបាយការណ៍សិក្សាតម្រូវការទឹករបស់​រដ្ឋាករទឹកស្វយ័តក្រុង​ភ្នំពេញ ឆ្នាំ២០១៦-២០៣០ បានបង្ហាញថា រាជធានីភ្នំពេញមាននិន្នាការខ្វះទឹកស្អាតប្រើប្រាស់នាឆ្នាំ ២០១៦ និងឆ្នាំ២០១៧ និងចាប់ផ្តើមខ្វះទឹកប្រើប្រាស់ចាប់ពីឆ្នាំ​២០១៨ រហូតដល់ឆ្នាំ២០២៣។ ជាក់ស្ដែងនៅឆ្នាំ២០២៣ តម្រូវការទឹកប្រើប្រាស់បានកើនឡើង ជាង​៨៩​ម៉ឺនម៉ែត្រគូបក្នុងមួយថ្ងៃ នៅពេលដែលសមត្ថភាពផលិតទឹកជាក់ស្តែងរបស់​រដ្ឋាករទឹកស្វយ័តក្រុង​ភ្នំពេញ មានប្រមាណ​តែ ៦៤​ម៉ឺន​ម៉ែត្រ​គូប​ក្នុងមួយថ្ងៃតែប៉ុណ្ណោះ មានន័យថា​ខ្វះទឹកផ្គត់ផ្គង់ចំនួន ២៥ ម៉ឺនម៉ែត្រគូបក្នុងមួយថ្ងៃ។

ស្ថិតក្នុងបរិការណ៍នេះ រាជរដ្ឋាភិបាលបានជួយគាំទ្រ​រដ្ឋាករទឹកស្វយ័តក្រុង​ភ្នំពេញយ៉ាងពេញទំហឹងក្នុងការផ្តល់​ទុន​វិនិយោគ ដើម្បីមានលទ្ធភាពសាងសង់រោងចក្រផលិតទឹកថ្មី ដែលមានសមត្ថភាពអាចផលិតទឹកស្អាតបានក្នុងបរិមាណ​៤០​​ម៉ឺនម៉ែត្រគូបក្នុងមួយថ្ងៃ និងបំពង់ចែកទឹកថ្មីជិត ១ ពាន់គីឡូម៉ែត្រ ដើម្បីដោះស្រាយបញ្ហាខ្វះទឹកជាជំហានៗឲ្យខាង​តែបានចាប់ពីឆមាសទី ១ ឆ្នាំ២០២៣ នេះតទៅ។

ចាប់ពីដើមឆ្នាំ២០២៤ តទៅ សមត្ថភាពផលិតទឹកស្អាតរបស់រដ្ឋាករទឹកស្វយ័តក្រុង​ភ្នំពេញ​មានជាង ១ លាន​ម៉ែត្រគូបក្នុងមួយថ្ងៃ ធៀបនឹងការព្យាករណ៍តម្រូវការទឹកដែលមានប្រមាណ ៩០ ម៉ឺនម៉ែត្រគូបក្នុងមួយថ្ងៃ មាន​ន័យ​ថា អតិថិជនរស់​នៅ​រាជធានីភ្នំពេញ និងក្រុងតាខ្មៅទាំងអស់​នឹង​មានទឹកប្រើប្រាស់គ្រប់គ្រាន់៕