ព័ត៌មានជាតិ

លោក លី ធុជ អញ្ជើញបើកព្រឹត្តិការណ៍បង្ហោះខ្លែងថ្នាក់អន្តរជាតិដំបូងបង្អស់នៅកម្ពុជា (SkyFest) ក្រោមពាក្យស្លោក “ខ្មែរអាចហោះបាន”

បានផុស

២ years មុន

នៅ

ថ្ងៃសៅរ៍ ៦ ឧសភា ២០២៣

ដោយ

ព្រះសីហនុ ៖ ថ្ងៃទី០៦ ខែឧសភា ឆ្នាំ២០២៣ ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រី លី ធុជ បានអញ្ជើញជាភ្ញៀវកិត្តិយស និងថ្លែងសុន្ទរកថាក្នុងពិធីបើកព្រឹត្តិការណ៍បង្ហោះខ្លែងថ្នាក់អន្តរជាតិដំបូងបង្អស់នៅកម្ពុជា (SkyFest) ក្រោមពាក្យស្លោក “ខ្មែរអាចហោះបាន” ដែលប្រារព្ធឡើងនៅបរិវេណគម្រោង Bay of Lights ក្នុងក្រុងព្រះសីហនុ និងរៀបចំឡើងដោយ ក្រុមហ៊ុនខេនូភី សែន ឌីវេឡុបម៉ិន (Canopy Sands Development) ដែលជាក្រុមហ៊ុនអភិវឌ្ឍន៍អចនទ្រព្យសំខាន់របស់ក្រុមហ៊ុនព្រីនស៍ ហូលឌីង គ្រុប (Prince Holding Group)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រឹត្តិការណ៍ SkyFest នេះ មានការអញ្ជើញចូលរួមពី លោក Edward Lee នាយកគ្រប់គ្រងក្រុមហ៊ុន ខេនូភី សែន ឌីវេឡុបម៉ិន និងអ្នកបង្ហោះខ្លែងមកពីប្រទេសចំនួន ០៩ រួមមាន កម្ពុជា ឥណ្ឌូនេស៊ី វៀតណាម ថៃ ហ្វីលីពីន សឹង្ហបូរី ម៉ាឡេស៊ី ចិន និងបារាំង។

ក្នុងនាមរាជរដ្ឋាភិបាល និងប្រជាជនកម្ពុជា លោកទេសរដ្ឋមន្ត្រី លី ធុជ បានស្វាគមន៍យ៉ាងកក់ក្តៅចំពោះអ្នកចូលរួមបង្ហោះខ្លែងមកពី ៩ ប្រទេស ព្រមទាំងបានថ្លែងអំណរគុណយ៉ាងជ្រាលជៅជូនចំពោះ ក្រុមហ៊ុន ខេនូភី សែន ឌីវេឡុបម៉ិន នៃក្រុមហ៊ុនព្រីនស៍ ហូលឌីង គ្រុប សម្រាប់ការលះបង់ និងការខិតខំប្រឹងប្រែងរៀបចំធ្វើឱ្យព្រឹត្តិការណ៍ SkyFest នេះ ក្នុងគោលបំណងលើកកម្ពស់ថែរក្សាវប្បធម៌ប្រពៃណីជាតិ និងប្រមូលផ្តុំមហាគ្រួសារខ្មែរក្រោមស្មារតីតែមួយ ដើម្បីឲ្យយុវជនជំនាន់ក្រោយបានយល់ដឹង និងចេះស្រឡាញ់ថែរក្សានូវអ្វីដែលខ្មែរមាន ហើយវាក៏ជានិមិត្តរូបនៃភាពធន់ ភាពច្នៃប្រឌិត និងសក្តានុពលគ្មានទីបញ្ចប់។ ប្រធានបទ “ខ្មែរអាចហោះបាន” មិនត្រឹមតែឆ្លុះបញ្ចាំងពីគុណតម្លៃនៃខ្លែងហោះខ្ពស់ប៉ុណ្ណោះទេ ប៉ុន្តែក៏ជាក្តីប្រាថ្នា និងក្តីសុបិនរបស់ប្រជាជនកម្ពុជាផងដែរ នៅពេលដែលយើងបន្តបោះជំហានឆ្ពោះទៅកាន់អនាគតដ៏ត្រចះត្រចង់។

ឆ្លៀតក្នុងឱកាសនោះ លោកទេសរដ្ឋមន្ត្រី បានបញ្ជាក់បន្ថែមទៀតថា ព្រឹត្តិការណ៍ SkyFest នាថ្ងៃនេះ អាចកើតឡើងបាន គឺយើងមិនអាចបំភ្លេចបានឡើយអំពីការលះបង់ដ៏ធំធេងរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការនាំមកនូវសុខសន្តិភាព និងការអភិវឌ្ឍដល់ប្រទេសជាតិ ហើយព្រឹត្តិការណ៍នេះទៀតសោត គឺជាសក្ខីភាពមួយដែលកើតឡើងក្រោមម្លប់សន្តិភាពដែលយើងទទួលបាន។

សម្តេចតេជោ បានដឹកនាំប្រទេសកម្ពុជាប្រកបដោយចក្ខុវិស័យវែងឆ្ងាយ ហើយតែងតែប្តេជ្ញាចិត្តឥតងាករេដើម្បីធ្វើឲ្យប្រទេសជាតិ និងប្រជាជនកម្ពុជារបស់សម្តេចមានការរីកចម្រើន។

លោកទេសរដ្ឋមន្ត្រី បានបន្តទៀតថា ក្រុមហ៊ុនព្រីនស៍ ហូលឌីង គ្រុប ក៏បានចូលរួមចំណែកជាមួយសម្តេចតេជោ ក្នុងការអភិវឌ្ឍប្រទេសកម្ពុជាផងដែរ ក្នុងនោះបានចូលរួមលើកកម្ពស់ខេត្តព្រះសីហនុទៅជាគោលដៅទេសចរណ៍លំដាប់ពិភពលោក តាមរយៈគម្រោងអភិវឌ្ឍន៍ឆ្នេរសមុទ្រ Bay of Lights របស់ក្រុមហ៊ុន ខេនូភី សែន ឌីវេឡុបម៉ិន ព្រមទាំងបានដាក់ចេញនូវមហិច្ឆតាក្នុងការបង្កើតឱកាសការងារជាច្រើនសម្រាប់ប្រជាជនកម្ពុជា និងការអភិវឌ្ឍធនធានមនុស្សជំទាន់ក្រោយរបស់កម្ពុជា តាមរយៈគំនិតផ្តួចផ្តើមដូចជាអាហារូបករណ៍ Chen Zhi ជាដើម។ ព្រឹត្តិការណ៍ SkyFest ដែលរៀបចំដោយ ក្រុមហ៊ុន ខេនូភី សែន ឌីវេឡុបម៉ិន មិនត្រឹមតែជាការប្រារព្ធពិធីនៃបេតិកភណ្ឌវប្បធម៌របស់យើងប៉ុណ្ណោះទេ ប៉ុន្តែវាក៏ជាការវិនិយោគនាពេលអនាគតរបស់យើងផងដែរ ដោយបំផុសគំនិត និងអប់រំសិស្សានុសិស្សរាប់ពាន់នាក់អំពីសារៈសំខាន់នៃការដឹងគុណវប្បធម៌ ក៏ជាឱកាសដើម្បីរៀនសូត្រពីគ្នាទៅវិញទៅមក និងកសាងទំនាក់ទំនងយូរអង្វែង៕