គ្រោះរន្ទះបាញ់បណ្តាលឱ្យមនុស្សស្លាប់ និងរបួសជាង១០នាក់ក្នុងរយៈពេល៤ខែ

គ្រោះរន្ទះបាញ់នៅក្នុងរយៈពេល៤ខែឆ្នាំនេះបានបណ្តាលឱ្យមនុស្សស្លាប់ និងរបួសប្រមាណជាង១០នាក់ និងងាប់គោក្របី​ជាង១០ក្បាល។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅព្រឹក​ថ្ងៃទី៧ ខែឧសភានេះថា ក្នុងរយៈពេល៤ខែឆ្នាំនេះ គ្រោះរន្ទះបាញ់បានកើតឡើងចំនួន១៧លើកបណ្តាល្យខូចខាតផ្ទះចំនួន១ខ្នងស្លាប់មនុស្ស៨ស្លាប់ និងរងរបួសមនុស្ស៤នាក់ និងងាប់គោក្របីចំនួន១៦ក្បាល។

លោក សុទ្ធ គឹមកុលមុនី បានបន្តថា ចំនួននេះបើប្រៀបធៀបទៅនឹងរយៈពេល៤ខែឆ្នាំ២០២២កន្លងទៅ ឃើញ​ថាមានការថយចុះគួរឱ្យកត់សម្គាល់ដោយ៤ខែឆ្នាំមុនមានករណីគ្រោះរន្ទះបាញ់ចំនួន៣២លើក បណ្តាលឱ្យខូចខាតផ្ទះចំនួន​១១ខ្នង ស្លាប់មនុស្សចំនួន៩នាក់ និងរបួសចំនួន៩នាក់ ព្រមទាំងងាប់គោក្របីចំនួន២៣ក្បាល។

រយៈពេល៤ខែនេះដែរគ្រោះអគ្គិភ័យបានកើតឡើងចំនួន២៥៦លើក បណ្តាលឱ្យខូតខាតផ្ទះចំនួន២៩០ខ្នង ល្វែង ឆេះតូបផ្សារចំនួន២១តូប ឃ្លាំងទំនិញចំនួន២សាលារៀន១ខ្នងរោងចក្រសិប្បកម្ម៥កន្លែង អគាររដ្ឋបាលចំនួន៥កន្លែងស្លាប់ម
នុស្សចំនួន១៣នាក់និងរបួស១៩នាក់។ ចំណែកបាតុភូតខ្យល់កន្ត្រាក់ក្នុងរយៈពេល៤ខែនេះបានកើតឡើងចំនួន​១០១​លើក​បណ្តាលឱ្យរលំផ្ទះនិងខូចខាតធ្ងន់ធ្ងរចំនួន១០១១ខ្នងរបើកដំបូលផ្ទះខូចខាតមធ្យមចំនួន៧៣២៨ខ្នងសាលា​រៀន៥៥ខ្នងអគាររដ្ឋបាល១៤កន្លែង តូបលក់ដូរ៤០តូបស្លាប់មនុស្ស៦នាក់និងរងរបួសចំនួន៨៧នាក់៕

អត្ថបទ៖ សំអឿន