មកដឹងលទ្ធផលសាងសង់ មន្ទីរពេទ្យធំជាងគេ របស់កម្ពុជា មន្ទីរពេទ្យ តេជោសន្តិភាព

មន្ទីរពេទ្យជាតិ តេជោសន្ដិភាព ជាមន្ទីរពេទ្យធំជាងគេ សាងសង់លើផ្ទៃដីទំហំជិត ៨ ហិកតា ស្ថិតនៅក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ គ្រោងនឹងបញ្ចប់ការសាងសង់ជាស្ថាពរ នៅចុងខែឧសភា ឆ្នាំ២០២៣នេះ ខណៈបច្ចុប្បន្នការសាងសង់សម្រេចបាន ៩០%។

នៅក្នុងកាសដឹកនាំគណៈប្រតិភូសុខាភិបាល ចុះពិនិត្យពីវឌ្ឍនភាពរបស់មន្ទីរពេទ្យជាតិ តេជោសន្ដិភាព នាថ្ងៃទី៩ ខែឧសភានេះ លោកស្រីវេជ្ជបណ្ឌិត យក់ សម្បត្ដិ រដ្ឋលេខាធិការប្រចាំការក្រសួងសុខាភិបាល និងជាប្រធានក្រុមប្រឹក្សាភិបាលមន្ទីរពេទ្យជាតិ តេជោសន្ដិភាព មានប្រសាសន៍ថា មន្ទីរពេទ្យជាតិ តេជោសន្ដិភាព បានចាប់ផ្តើមសាងសង់នៅថ្ងៃទី១៤ ខែកុម្ភៈ ឆ្នាំ២០២២ រហូតមកដល់ពេលនេះ សម្រេចបានប្រមាណ ៨៥-៩០% គ្រោងនឹងបញ្ចប់ការជាស្ថាពរនៅចុងខែឧសភា ឆ្នាំ២០២៣ និងត្រៀមបើកសម្ពោធជាផ្លូវការនៅចុង ខែមិថុនាខាងមុខនេះ ក្រោមអធិបតីភាពដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ដ្រីកម្ពុជា។

លោកស្រីវេជ្ជបណ្ឌិត យក់ សម្បត្ដិ បានណែនាំដល់ក្រុមការងារទាំងអស់ខិតខំប្រឹងប្រែងធ្វើយ៉ាងណាឱ្យការងារសាងសង់នេះទទួលបានជោគជ័យតាមគ្រោងទុកនៅចុងខែឧសភានេះ ដើម្បីបម្រើសេវាជូនប្រជាពលរដ្ឋ ព្រោះតាមការវាយតម្លៃ ការសាងសង់បានប្រហែលជា ៨៥ ទៅ៩០% នៅតែការងារបន្ទាប់បន្សំប្រហែលជា ១០-១៥% ប៉ុណ្ណោះ។

លោកស្រីវេជ្ជបណ្ឌិត យក់ សម្បត្ដិ មានប្រសាសន៍បន្តថា ក្នុងឱកាសដែលកម្ពុជាធ្វើជាម្ចាស់ផ្ទះព្រឹត្ដិការណ៍កីឡាស៊ីហ្គេម មន្ទីរពេទ្យជាតិ តេជោសន្ដិភាព បានពិនិត្យពិគ្រោះ និងព្យាបាលសុខភាព ជូនកីឡាករ កីឡាការិនី ភ្ញៀវទេសចរជាតិ និងអន្ដរជាតិ រួមទាំងប្រជាពលរដ្ឋមកពីតាមបណ្ដាលខេត្ដ ដែលមកទស្សនានូវព្រឹត្ដិការណ៍កីឡាស៊ីហ្គេមផងដែរ។

គួរបញ្ជាក់ថា មន្ទីរពេទ្យជាតិ តេជោសន្ដិភាព មានអគារសម្រាកព្យាបាល និងសង្គ្រោះបន្ទាន់  អគារសម្រាកព្យាបាលកម្រិតធ្ងន់ អគារសម្រាកព្យាបាលកម្រិតស្រាល និងអគារបច្ចេកទេសដោយមានគ្រែសម្រាប់ដាក់អ្នកជំងឺប្រមាណ ១ម៉ឺនគ្រែ។ លើសពីនេះ មន្ទីរពេទ្យ មានចំណតរថយន្តធំទូលាយ សួនច្បារ  សួនបៃតង អគារផ្គត់ផ្គង់ និងព័ត៌មានព្រម ទាំងអគារស្នាក់នៅសម្រាប់បុគ្គលិកផងដែរ៕

អត្ថបទ៖ សំអឿន