ព័ត៌មានជាតិ

កោះចំនួន ៧ នៅខេត្តកែប ទទួលបានការវិនិយោគបម្រើដល់វិស័យទេសចរណ៍

បានផុស

២ years មុន

នៅ

ថ្ងៃសុក្រ ១២ ឧសភា ២០២៣

ដោយ

Dy Bunnara

កោះចំនួន ៧ ក្នុងចំណោមកោះទាំង ១២ នៅខេត្តកែបទទួលបានការវិនិយោគដើម្បីបម្រើដល់វិស័យទេសចរណ៍។

ថ្លែងនៅក្នុងសន្និសីទជោគជ័យរយៈពេល ៥ ឆ្នាំ របស់រដ្ឋបាលខេត្តកែបកាលពីម្សិលមិញនេះ លោក សោម ពិសិដ្ឋ អភិបាលខេត្តកែបបានបញ្ជាក់ថា ខេត្តកែបមានកោះចំនួន ១២ ក្នុងនោះមានកោះចំនួន ០៧ ទទួលបានគោលការណ៍វិនិយោគពីរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អភិបាលនៃគណៈអភិបាលខេត្តកែប

លោកបន្តថា កោះទាំង ៧ ដែលទទួលបានការអនុញ្ញាតិពីរដ្ឋាភិបាលដើម្បីវិនិយោគបម្រើដល់វិស័យទេសចរណ៍ រួមមានកោះទន្សាយ កោះពោធិ៍ កោះត្បាល់ កោះការាំង កោះស្វាយ កោះកុក និងកោះម្ទេស។

ខេត្តកែបមានកោះចំនួន ១២ ថ្មប៉ប្រះទឹក ០១ កន្លែង និងថ្មដុះស្ងួត ០១ កន្លែង។ ខេត្តជាប់សមុទ្រនៅភាគនីរតីនេះមានចម្ងាយ ១៧៥ គីឡូម៉ែត្រពីរាជធានីភ្នំពេញ។

លោកសោម ពិសិដ្ឋ បានឲ្យដឹងថា កោះទន្សាយដែលទទួលបានវិនិយោគកំពុងដំណើរការអាជីវកម្ម ខណៈកោះកុក កោះស្វាយ កោះម្ទេស រដ្ឋបាលខេត្តកំពុងជំរុញអ្នកវិនិយោគអនុវត្តគម្រោងរបស់ខ្លួន។ យ៉ាងណាមិញ ក៏មានកោះមួយចំនួនដែលទទួលបានសិទ្ធិវិនិយោគរួចមិនមានសកម្មភាពអភិវឌ្ឍ ហើយរដ្ឋបាលខេត្តកំពុងស្នើសុំគោលការណ៍ពីរដ្ឋាភិបាលដើម្បីបញ្ចប់ ឬដកហូតមកគ្រប់គ្រងវិញ។

នៅក្នុងរយៈពេល ៥ ឆ្នាំ ខេត្តកែបទទួលបានគម្រោងវិយោគផ្សេងៗដូចជា គម្រោងសាងសង់ផ្សារដំណាក់ចង្អើរថ្មី, គម្រោងសាងសង់ផ្សាររាត្រី, គម្រោងសាងសង់ចំណតជលយាន្ត (កំពង់ផែសេះស), សាងសង់មណ្ឌលកម្សាន្ត និងអភិវឌ្ឍន៍បរិវេណឆ្នេរ, គម្រោងខ្សែរ៉ក ZIP LINE ចំណតជលយានទេសចរណ៍ និងអនាម័យឆ្នេរចាក់ខ្សាច់ថ្មី និងការវិនិយោគបង្កើតទីក្រុងរណបជាប់ឆ្នេរសមុទ្រជាដើម។

បើតាមលោកអភិបាលខេត្ត ក្រៅពីគម្រោងវិនិយោគជាច្រើននៅក្នុងខេត្តកែប រាជរដ្ឋាភិបាលបានផ្ដល់គោលការណ៍អភិវឌ្ឍតំបន់ការពារធនធានធម្មជាតិឧទ្យានជាតិកែបជាអេកូទេសចរណ៍ខ្នាតតូច ដោយឲ្យមិនប៉ះពាល់ដល់ធនធានធម្មជាតិនៅទីនោះទេ។

បើតាមមន្ទីរទេសចរណ៍ខេត្តកែប នៅខេត្តកែបមានតំបន់ទេសចរណ៍សរុបចំនួន ៣៥ កន្លែង។ ខេត្តមានសណ្ឋាគារចំនួន ១៧ កន្លែង ផ្ទះសំណាក់ ៥៨ កន្លែង បឹងហ្គាឡូរីសតចំនួន ២១ កន្លែង ដើម្បីបម្រើការស្នាក់នៅរបស់ភ្ញៀវទេសចរ៕