លោក គួច ចំរើន បន្តទទូចសុំពលរដ្ឋឈប់ចោលសំរាមផ្ដេសផ្ដាស

លោក គួច ចំរើន អភិបាលនៃគណៈអភិបាលខេត្តព្រះសីហនុ បន្តទទូចស្នើអោយប្រជាពលរដ្ឋក្នុងមូលដ្ឋានយកចិត្តទុកដាក់ខ្ពស់ទៅលើបរិស្ថាន ដែលវាជាកត្តាចម្បងបំផុតក្នុងការលើកកម្ពស់មុខមាត់ខេត្តទាំងមូល ។

លោកបានបង្ហាញភាពខ្វះចន្លោះ និងការមិនយកចិត្តទុកដាក់មួយចំនួនរបស់ប្រជាពលរដ្ឋនៅខេត្តព្រះសីហនុ ពោលគឺការទុកដាក់សំរាមមិនបានត្រឹមត្រូវ ពាសវាលពាសកាលដែលវាប៉ះពាល់ទៅលើសណ្ដាប់ធ្នាប់ សោភ័ណ្ឌភាព និងបណ្ដាលអោយកូនឈើក្បែរនោះងាប់ជាដើម។ ហើយបើតាមការបញ្ជាក់លើទំព័រផេកផ្លូវការនៅយប់មិញនេះ លោកសង្កត់ធ្ងន់ថា «អ្នកព្រះសីហនុយើង សូមឈប់យកសំរាមមកដាក់នៅគល់ឈើបែបនេះទៀត ជាតិខ្លាញ់ ជាតិប្រេង ជាតិប្រៃ ស្រក់ជ្រាបចូលទៅ គឺបង្កអោយកូនឈើងាប់សោកស្ដាយណាស់ »។

នេះមិនមែនជាលើកទី១ទេ ដែលលោកអភិបាលខេត្តព្រះសីហនុបានអំពាវនាវដល់ពលរដ្ឋទាំងអ្នករស់នៅខេត្តព្រះសីហនុ និងភ្ញៀវទេសចរឱ្យទុកដាក់សំរាមឱ្យបានត្រឹមត្រូវ ជៀសវាងបោះចូលផ្តេសផ្តាសប៉ះពាល់ដល់បរិស្ថាន និងសោភណ្ឌភាពនៅក្នុងខេត្ត។

ខេត្តព្រះសីហនុនាប៉ុន្មានឆ្នាំចុងក្រោយនេះ មានការរីកចម្រើនយ៉ាងឆាប់រហ័សទៅលើវិស័យសំណង់ ហេដ្ឋារចនាសម្ព័ន្ធ សេដ្ឋកិច្ច និងបរិស្ថាន ដោយឡែកនៅមានភាពអវិជ្ជមានតិចតួច ដែលរដ្ឋបាលខេត្តបាន និងកំពុងយកចិត្តទុកដាក់ និងកែតម្រូវ៕

អត្ថបទ៖ ស៊ីថា