ព្រឹត្តិការណ៍ស៊ីហ្គេម បានបង្ហាញឱ្យពិភពលោក ស្គាល់កម្ពុជាកាន់តែច្បាស់

ការរៀបចំព្រឹត្តិការណ៍បើកស៊ីហ្គេមលើកទី៣២ របស់កម្ពុជា បានបង្ហាញចេញពីភាពអច្ឆរិយដ៏អស្ចារ្យ និងបានឆក់យក​ការចាប់អារម្មណ៍ពីបណ្តាប្រទេសក្នុងតំបន់អាស៊ាន រួមទាំងបណ្តាប្រទេសផ្សេងៗទៀត នៅលើសកលលោក ឱ្យស្គាល់កម្ពុជាកាន់តែច្បាស់ ដែលពុំនឹកស្មានថា កម្ពុជាធ្វើបានដល់កម្រិតនេះ ហើយព្រឹត្តិការណ៍នេះប្រហែល​ទៅនឹងព្រឹត្តិការណ៍កីឡាអូឡាំពិច ដែលប្រទេសផ្សេងៗបារម្ភថា ពុំអាចធ្វើដូចប្រទេសកម្ពុជា។ នេះគឺជាការលើកឡើង​របស់លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិ​សន្ដិសុខសង្គម(ប.ស.ស)។

ថ្លែងនៅក្នុងកិច្ចប្រជុំពិនិត្យលើវឌ្ឍនភាពការងារប្រចាំខែ មេសា កាលពីថ្ងៃទី១២ឧសភា លោក អ៊ុក សមវិទ្យា បានបញ្ជាក់ទៀតថា ភាពជោគជ័យដ៏អស្ចារ្យនេះ គឺបានកើតចេញពីបេះដូងដ៏ទូលាយរបស់ សម្ដេចតេជោ បានរ៉ាប់រងរាល់ចំណាយទាំងអស់ ទាំងការស្នាក់នៅ ការហូបចុក ចំពោះអត្តពលិក ដែលមានតែប្រទេស​កម្ពុជាប៉ុណ្ណោះធ្វើរឿងនេះឡើងដំបូងគេ ហើយនេះជាសមិទ្ធិផលដែលមិនអាចបំភ្លេចបានរបស់រាជរដ្ឋាភិបាល ក៏ដូចជាប្រជាជនកម្ពុជា ក្រោមការដាក់ចេញនូវគោលនយោបាយឈ្នះឈ្នះ របស់សម្ដេចតេជោនាយករដ្ឋមន្រ្ដី ក្នុងការរក្សាបានលំនឹងម៉ាក្រូសេដ្ឋកិច្ច ស្ថិរភាពនយោបាយ និងសន្ដិភាពពេញលេញ ដែលបានមកពីការរួប​រួមសាមគ្គីគ្នាក្រោមម្លប់សន្ដិភាព ទើបកម្ពុជា អាចបង្ហាញមុខមាត់ថ្មីលើឆាកអន្ដរជាតិចំពោះ​ព្រឹត្តិការណ៍ស៊ីហ្គេម​លើកទី៣២ នេះ។

លោកបានប្រៀបធៀបថា សម្រាប់ ប. ស. ស. ក៏ដូចគ្នាផងដែរ ក្នុងការបំពេញការងារកន្លងមក កត្តាសាមគ្គីភាពផ្ទៃក្នុង ជារឿងសំខាន់បំផុតដែលយើងទាំងអស់គ្នាកំពុងបម្រើការងារក្នុងអង្គភាពផ្តល់សេវាជាលក្ខណៈសង្គមត្រូវយកចិត្តទុកដាក់ និងរួបរួមគ្នាអនុវត្ត ដូចនេះយើងត្រូវចេះយោគយល់គ្នា តាមរយៈការសហការគ្នា អធ្យាស្រ័យជួយគ្នាទៅវិញទៅមក រក្សាស្មារតីសាមគ្គីភាពផ្ទៃក្នុង រួសរាយរាក់ទាក់ និងបង្កើនភាពស្និទ្ធស្នាល ដោយមានទំនាក់ទំនងល្អទៅវិញ​ទៅមកក្នុង​អង្គភាព រួមចិត្តរួមកម្លាំងដោយឈរលើមូលដ្ឋានតែមួយ ដែលនេះជាស្មារតីរួមត្រូវប្រតិបត្តិឱ្យបាន ទើបប្រសិទ្ធភាព​ការងារមាននិរន្តភាព និងធ្វើប្រព័ន្ធសន្ដិសុខសង្គមកម្ពុជា កាន់តែរីកចម្រើនទៅមុខបន្ថែមទៀត។

គួរបញ្ជាក់ថា ព្រឹត្តិការណ៍ស៊ីហ្គេម លើកទី៣២ ដែលកម្ពុជា ធ្វើជាម្ចាស់ផ្ទះនេះបានចាប់ផ្តើមពីថ្ងៃទី៥ ឧសភា រហូតដល់​ថ្ងៃទី១៧ខែឧសភាឆ្នាំ២០២៣ ដោយមានគណៈប្រភូកីឡា និងអត្តពលិកចូលរួមប្រមាណជាង១ម៉ឺននាក់៕

អត្ថបទ៖ សំអឿន