អ្នកស្លាប់ក្នុងករណី​បាញ់ប្រហារ​នៅក្រុងព្រះសីហនុ ជាជនជាតិចិន

បុរសជនជាតិចិនម្នាក់ ត្រូវបានខ្មាន់កាំភ្លើងបាញ់សម្លាប់ ក្នុងពេលធ្វើដំណើរតាមរថយន្ត ត្រង់ចំណុចវត្តក្រោម ស្ថិតក្នុងសង្កាត់លេខ៣ ក្រុងព្រះសីហនុ ខេត្តព្រះសីហនុ បង្កឱ្យមានការភ្ញាក់ផ្អើល កាលពីវេលាម៉ោង៨ និង២០នាទី ​នាថ្ងៃទី២១ ខែមករា ឆ្នាំ២០២១  ។

តាមសេចក្តីរាយការណ៍ពីភ្នាក់ងារ កម្ពុជាថ្មី ប្រចាំខេត្តព្រះសីហនុ បានឱ្យដឹងថា ករណីឃាតកម្មនេះ បានបណ្ដាលឱ្យជនជាតិចិនម្នាក់​ស្លាប់ ។ ប្រភពបន្តថា នៅមុខពេលកើតហេតុ ជនរងគ្រោះ និងអ្នកបើកបររថយន្តម្នាក់ទៀត បានធ្វើដំណើរតាមបណ្ដោយផ្លូវអូតែល៧ជាន់ លុះបន្តិចក្រោយមក ក៏មានខ្មាន់កាំភ្លើងបាញ់ប្រហារមកលើរថយន្តចំនួន៣គ្រាប់ បណ្ដាលឱ្យត្រូវអ្នកអង្គុយខាងក្រោយស្លាប់តែម្ដង ហើយអ្នកបើកបរពុំមានរងរបួសអ្វីឡើយ ហើយបានបន្តដឹកជនរងគ្រោះមកកាន់មន្ទីរពេទ្យ ស្ថិតក្នុងសង្កាត់លេខ២ បង្កឱ្យមានការភ្ញាក់ផ្អើលតែម្ដង។

​តាមសេចក្តីរាយការណ៍ពីភ្នាក់ងារ កម្ពុជាថ្មី ប្រចាំខេត្តព្រះសីហនុ បានឱ្យដឹងទៀតថា សមត្ថកិច្ចបានហ៊ុំព័ទ្ឋទីតាំងកើតហេតុ ដើម្បីស្រាវជ្រាវបន្តតាមនីតិវិធី៕

សូមរង់ចាំអានព័ត៌មានបន្ថែមនៅពេលក្រោយទៀត!