ព័ត៌មានជាតិ

នៅសល់មួយភូមិទៀត ខេត្តកែបនឹងបញ្ចប់ការចុះបញ្ជីដីធ្លីជាប្រព័ន្ធគ្រប់ភូមិទូទាំងខេត្ត

បានផុស

២ years មុន

នៅ

ថ្ងៃពុធ ១៧ ឧសភា ២០២៣

ដោយ

អាជ្ញាធរខេត្តកែបបានដាក់ទិសដៅ ក្នុងការបញ្ចប់ការចុះដីធ្លីជាប្រព័ន្ធនៅក្នុងខេត្តឲ្យបញ្ចប់ ១០០% នៅឆ្នាំ ២០២៣។ ការអះអាងនេះធ្វើឡើងនៅក្នុងសន្និសីទជោគជ័យរយៈពេល ៥ ឆ្នាំរបស់រដ្ឋបាលខេត្តកាលពីសប្តាហ៍មុននេះ។

លោក សោម ពិសិដ្ឋ អភិបាលនៃគណៈអភិបាលខេត្តកែបបានបញ្ជាក់ថា ការចុះបញ្ជីដីធ្លីជាប្រព័ន្ធនៅខេត្តកែបសឹងតែបញ្ចប់គ្រប់ភូមិ នៅសល់តែមួយភូមិទៀតនឹងបញ្ចប់ទាំងស្រុង។ រដ្ឋបាលខេត្តនឹងជំរុញធ្វើយ៉ាងម៉េចឲ្យការចុះបញ្ជីដីធ្លីទូទាំងខេត្តឲ្យបញ្ចប់ ១០០% នៅឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងការគ្រប់គ្រងដីធ្លីទូទាំងខេត្ត លោកអភិបាលខេត្តបានឲ្យដឹងថា បានរៀបចំការប្រើប្រាស់ដីធ្លីគ្រប់ភូមិ និងរៀបចំការធ្វើប្លង់គោលអភិវឌ្ឍនៅក្រុងកែប និងស្រុកដំណាក់ចង្អើរបញ្ចប់ ១០០%។

ដោយឡែកការគ្រប់គ្រងផ្នែកសំណង់អាជ្ញាធរក៏មានការប្រុងប្រយ័ត្នខ្ពស់លើការចេញច្បាប់អនុញ្ញាត ក្រោយព្រឹត្តិការណ៍បាក់រលំអគារនៅដើមឆ្នាំ ២០២០ ដើម្បីសុវត្ថិភាពដល់ពលរដ្ឋ។

បន្ថែមពីនេះលោកអភិបាលខេត្តកែបបានបញ្ជាក់ទាក់ទងការផ្តល់ការវិនិយោគលើវិស័យអចនទ្រព្យដូចជាគម្រោងវិនិយោគពុះដីឡូត៍ ក៏ត្រូវបានពិនិត្យយ៉ាងហ្មត់ចត់ គោលបំណងដើម្បីការពារកុំឲ្យមានអ្នកវិនិយោគខ្លះដែលមិនស្មោះត្រង់ មកវិនិយោគបោកប្រាស់ប្រជាពលរដ្ឋដែលនាំឲ្យខាតពេលវេលា ខាតថវិកា និងប៉ះពាល់ផលប្រយោជន៍របស់ពលរដ្ឋ។

ខេត្តកែបមានផ្ទៃដីទំហំត្រឹម ១៨៧,២៤ គីឡូម៉ែត្រការ៉េ ដោយបែងចែកជាក្រុង ០១ ស្រុក ០១ មាន ០២ ឃុំ ០៣ សង្កាត់ និង១៨ ភូមិ និងមានពលរដ្ឋជាង ៤ ម៉ឺននាក់។

ខេត្តកែបមានអំណោយផលដល់វិស័យទេសចរណ៍ក្នុងនោះមានឆ្នេរសមុទ្រ មានកោះ មានព្រៃកោងកាងនិងសក្តានុពលធនធានធម្មជាតិដែលទាក់ទាញដល់អ្នកទេសចរ។ រាជរដ្ឋាភិបាលបានកំណត់គោលដៅយុទ្ធសាស្ត្រអភិវឌ្ឍទេសចរណ៍ខេត្តកែប ឱ្យក្លាយទៅជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់និងពិភពលោក៕