រដ្ឋមន្ត្រីក្រសួងសុខាភិបាល ចុះសួរសុខទុក្ខក្រុមគ្រូពេទ្យប្រចាំការ ព្រឹត្តិការណ៍ស៊ីហ្គេម

នាព្រឹកថ្ងៃទី១៧ ខែឧសភា ឆ្នាំ២០២៣ សាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល អមដំណើរដោយថ្នាក់ដឹកនាំក្រសួងសុខាភិបាល បានអញ្ជើញចុះសំណេះសំណាល និងសួរសុខទុក្ខ ដល់ក្រុមគ្រូពេទ្យយាមប្រចាំការ និងការពារសុខភាពជូនប្រជាពលរដ្ឋ ចាប់តាំងពីមុនថ្ងៃបើកព្រឹត្តិការណ៍ កីឡាស៊ីហ្គេមលើកទី៣២ នៅពហុកីឡដ្ឋានជាតិមរតកតេជោ។

គួរបញ្ជាក់ថា ដើម្បីត្រៀមផ្តល់សេវាការពារសុខភាព និងសង្គ្រោះបន្ទាន់ក្នុងព្រឹត្តិការណ៍​នៃការប្រកួត​កីឡានេះ ក្រសួងសុខាភិបាល សហការ​ជាមួយ​ស្ថាប័នពាក់ព័ន្ធ បានរៀបចំ​ផែនការការពារសុខភាព និងសង្គ្រោះបន្ទាន់ដោយឥតគិតថ្លៃ ក្នុងនោះបានត្រៀម៖ មន្ទីរពេទ្យជាតិចំនួន ៧ គឺមន្ទីរពេទ្យជាតិតេជោសន្តិភាព មន្ទីរពេទ្យកាល់ម៉ែត មន្ទីរពេទ្យ​មិត្តភាពកម្ពុជា-ចិន ព្រះកុសុមៈ មន្ទីរពេទ្យមិត្តភាពខ្មែរ-សូវៀត មន្ទីរពេទ្យកុមារជាតិ មន្ទីរពេទ្យព្រះអង្គឌួង និងមជ្ឈមណ្ឌលជាតិ គាំពារមា តា និងទារកជាដើម។

មន្ទីរពេទ្យបង្អែកខេត្តចំនួន ៤ គឺខេត្តសៀមរាប ខេត្តព្រះសីហនុ ខេត្តកំពត និងខេត្តកែប។ ក្រុមគ្រូពេទ្យសរុបចំនួន ៨៣៣នាក់ ក្នុងនោះនៅរាជធានីភ្នំពេញមានចំនួន ៤៥៧នាក់។ រថយន្តគិលានសង្គ្រោះចំនួន ១១៤គ្រឿង ក្នុងនោះនៅរាជធានីភ្នំពេញមានចំនួន ៧២គ្រឿង។ រថយន្តគ្លីនិកចល័តចំនួន ៩ គ្រឿង ក្នុងនោះនៅរាជធានីភ្នំពេញចំនួន ៦ គ្រឿង។ តង់សុខភាពចំនួន ១១ ក្នុងនោះនៅរាជធានីភ្នំពេញចំនួន ៧ តង់៕​